Tolosa, apenas capitala de la novèla region Occiània-Pirenèus-Mediterranèa, cerca de s’enauçar a nivel d’una metropòli europèa. Aquí perqué prevei de se bastir per 2021-22 una tor originala dessenhada per Daniel Libeskind: Occitan Tower o Tor d’Occitània[1]. La nautor, aquò’s la marca de la modernitat e d’una cèrta poténcia. Un gabinet americanò-tolosenc a adaptat lo projècte al seu entorn, a saber lo Canal del Miègjorn, Canal d’Occitània per excelléncia. Sus aquela ligason orizontala entre ocean e mar, la tor se quilharà cap al cèl a l’egal de la fusada Ariana de la Ciutat de l’Espaci. Los signes son aquí onte los desiram vèser. Afar de metafòra comunicativa e poetica. Cal notar que los signes arquitecturals son de manca a Tolosa dempuèi lo conjunt demorat inacabat de Candilis al Miralh. S’aquel projècte de tor desvaria d’unes tolosencs, segur qu’an doblidat lo nom balhat autres còps a Tolosa rapòrt a sa centenada de tors: ”un poète du moyen-âge donna à la capitale du Languedoc l’épithète de Turrita Tolosa”[2].
 
Una autra escomesa tecnologica ven d’un consòrci portat per Enedis:  Smart Occitania[3]; sa tòca es d’assegurar la ret de distribucion de l’electricitat (veitura electrica, energias renovelairas e lor estocatge) e de delargar una cadena numerica dins lo campèstre de la region Occitania mal servida fins ara. Enedis experimentarà lo projècte sus dos ans en Garona nauta e Lozèra. Lo consòrci en relacion amb lo CNES podrà melhor destriar los auvaris sus la ret electrica. Lo numeric aquò’s un palfèr per d’airals isolats. Conscient de l’ecosistèma regional, s’apiejaràn sus las start-buta e PME d’aicí, per tal de levar d’emplecs e d’afavorir l’exportacion.
 
Se lo desvolopament del sector terciari e lo creis urban s’inscrivon dins una dinamica internacionala, semblan d’anar de còtria amb la restructuracion de l’economia agricòla qu’es a se far aic í quitament: produches biologics, relançament de varietats perdudas o doblidadas, novacions alimentàrias...Un vertadièr laboratòri de sostèner, al moment justament dels replecs nacionalistas e de la crisi societala noirida d’un populisme e d’un proteccionisme agusats. S’entreten a l’ora d’ara la confusion entre lo liberalisme (que se fondèt istoricament contra l’absolutisme e l’estatisme) e l’ultraliberalisme ligat a un capitalisme pron fèr. Negociacion, regulacion e perequacion son de recercar, mas se vei que l’idèa de l’Estat es talament encloscada dins l’èime francés que se pòt pas reformar. Un afar de cultura qu’es tanben un afar d’economia: sabem plan cossí la manca de moneda alentís e minoriza las iniciativas occitanas sul terren.
 
Cossí concebre una civilizacion sens circulacion d’òmes, de merças e de moneda? Basta de considerar.la civilizacion dicha dels Trobadors tal coma la Renaissença tolosenca que se poguèron espandir mercès alencòp al negòci internacional e al mecenat intèrne.