Un daus primiers pas sus la scena internacionala dau noveu president francés es estat de s’opausar au president american per çò de l’acòrd de París sus lo chanjament climatic. Veiquí nòstre jòune menaire liberau vengut ecologista, en tot parodiar l’eslogan de Trump en “Make our planet great again” (Tornam sa grandor a la nòstra planeta). Mas coma far per i arribar? 
 
Lo president francés ven de crear un programa per aténer quel objectiu plan ambiciós. S’agís d’en primier, d’un sit web, que se vòu “un ostilh concret per permetre e facilitar la reüssita de tots los ciutadans engatjats”. I podem trobar “totas las responsas a las questions” que podem aver per que nòstre projecte puescha abotir. Un inciativa de las bravas. L’an confiada a la fondacion Hulot o au ministeri de la transicion ecologica e solidària? De segur, non. Quò es Business France, una agéncia governamentala emb 92 bureus dins lo monde entier, per far la promocion dau monde daus afars francés, que gerís lo sit.
 
Qual es l’objectiu vertadier de queu programa? Sufís de legir! “Confrontat au scepticisme climatic dau noveu governament daus Estats Units, lo president Emmanuel Macron convida los scientifics americans a venir trabalhar en França”. 
 
Adonc, podem dire que i a una volontat d’investir dins la recercha dins lo domeni environamentau, çò qu’es positiu. Mas, lo biais de far es lo dau liberalisme e de la concurréncia entre los país dins la guerra economica mondiala. L’objectiu me sembla pas tant de tornar sa grandor a la planeta coma de la tornar a l’economia francesa en se posicionar coma menaire dins queu sector. E quò es be çò que repròchan las grandas entrepresas americanas au president Trump.