Lo rock dich “gotic”
 
En 1979, un genre de rock amb un ambient misteriós e subtil se desvolopèt en Anglatèrra e ais Estats Units puei se difusèt dins la rèsta dau Mond. Lei jornalistas musicaus l’apelèron gotic en lo comparant a l’atmosfèra solombrosa dau corrent literari qu’avèm evocat (en anglés gothic rock, goth rock, goth). De noms equivalents coma deathrock o batcave aguèron pas tant de succès. Lei grops mai emblematics d’aqueu genre son Siouxsie and the Banshees, Bauhaus, Joy Division, Christian Death, Virgin Prunes, The Cure, The Sisters of Mercy, Fields of the Nephilim, Skeletal Family, Clan of Xymox e tanteis autres... 
 
Es una musica que se regenèra sens relambi amb de grops novèus coma Belgrado (en Catalonha) o She Past Away (en Turquia)...
 
 
Lo brinde dich “gotic”
 
Lei primiers grops de rock gotic avián de brindes divèrs. Certanei membres dau grop Bauhaus aguèron l’idèa, vèrs 1980, d’aparéisser sus scèna amb un abilhatge solombrós, de peus espelofits e un maquilhatge marcat per illustrar la musica que jogavan. Siouxsie Sioux, la cantaira de Siouxsie and the Banshees, desvolopèt la version femenina d’aqueu brinde amb un grand succès.
 
Uei es devengut la marca distintiva d’una “tribu urbana” que se desconnècta de mai en mai dau rock gotic e que se renovèla a cada generacion.
 
Lo brinde gotic se pòt trobar quitament dins de grops musicaus que fan pas ges de rock gotic mai puslèu d’heavy metal (coma Cradle of Filth), de rock industriau (coma Marilyn Manson) e mai de pòp inofensiu (coma Evanescence).
 
Lo brinde gotic l’arboran de jovents que coneisson pas totjorn lo rock gotic. En Japon lei lolitas goticas son celèbras.
 
Davant lei perilhs de caricatura de l’etiqueta “gotica”, certanei grops istorics de rock gotic coma Bauhaus, The Cure e The Sisters of Mercy an insistit per dire qu’elei vòlon pas èsser catalogats dins lo movement “gotic”... E son apareguts mai d’un còp amb de brindes “antigotics” en i fasent dominar lo blanc o lei colors vivas...
 
De maniera pus tragica, la cultura juvenila gotica es estada victima de repression dins lo regim autoritari d’Ozbequistan. Una peripècia de mai dins una lònga sèria d’incomprenesons...
 
Aqueleis istòrias illustran lei cas innombrables d’estigmatizacion, d’oblit, de resurreccion e de reïnvencion que boiran lo sovenir deis ancians gòts dins l’imaginacion collectiva...
 
 
La forma dei mots
 
En lenga occitana utilizam lo nom gòt~gòta per designar lei personas que pertanhon au pòble germanic d’origina: lei migracions dei gòts. L’adjectiu relatiu a aquela populacion pòt èsser gotic~gotica o pus rarament gòt~gòta: la cavalariá gotica o la cavalariá gòta. La lenga germanica d’aqueu pòble s’apèla lo gotic (es un nom format a partir de l’adjectiu).
 
Per evocar lei doas brancas istoricas d’aqueu pòble, lei mots rèstan semblants e recebon solament lei prefixes visi- e ostro-. Lei noms per lei personas son visigòt~visigòta e ostrogòt~ostrogòta. Leis adjectius son d’un caire visigotic~visigotica (o visigòt~visigòta) e d’autre caire ostrogotic~ostrogotica (o ostrogòt~ostrogòta).
 
Ara, per parlar dei movements culturaus ulteriors en arquitectura, en calligrafia, en musica o en mòda, l’occitan utiliza solament la forma gotic~gotica, que siá un nom relatiu a una persona (I a una banda de gotics dins lo licèu), un adjectiu (l’art gotic, una catedrala gotica, lei letras goticas, un roman gotic, lo rock gotic, una cantaira gotica) o que siá un nom de corrent format a partir de l’adjectiu (lo gotic coma corrent d’art medievau, lo gotic coma dessenh d’escritura, lo gotic coma genre de rock).
 
Lei dialèctes occitans escrivon toteis aquelei mots de maniera rigorosament identica, sola la pronóncia pòt variar.
 
Leis autrei lengas romanicas an d’usatges relativament similars, en particular lo catalan (got~goda, gòtic~gòtica...), l’espanhòu (godo~goda, gótico~gótica) e lo francés (Goth~Gothe, gothique). L’italian ditz goto~gota e gotico~gotica per lei fenomèns ancians mai preferís l’anglicisme goth per parlar dau recent corrent musicau e vestimentari.