La CNT-AIT, organizacion anarco-sindicalista de Tolosa s’es clarament pausicionada contra lo referéndum deu purmèr d’octobre en Catalonha. Per çò qu’es de lors arguments, los podètz legir ací, sonqu’en francés: http://cntaittoulouse.lautre.net/
 
Lo debat es interessant, e s’i cau clinar drin dessús.
 
Purmèr, cau saber que la CNT-AIT de Tolosa s’es dejà pausicionada contra la lenga occitana dens lo metrò tolosenc, dambe accions d’estampatge e distribucion de huelhòts sus unas plaças de la vila. Se sentissèva que lo subjècte los tocava pregondament, pr’amor qu’ac hèn pas tan sovent qu’aquò. Calèva que l’enjòc ne vala pena. L’auta CNT, dita “Vignolles” pr’amor de l’adreça de son seti, sosteng las culturas minorizadas.
 
Dusau, cau saber tanben qu’a la manifestacion deu 26 de seteme a Tolosa a favor de la votacion se trobavan sòcis d’Alternativa Libertària dambe drapèus, çò que muisha que’s pòt estar anarquista e sonténguer lo procèssus d’independéncia de Catalonha. Ende la CNT-AIT de Tolosa, se pòt pas.
 
Coneishèvi jo la teoria anarquista e generalament esquerrista, que disèva que la luta end’independéncia desvia la joentut deu combat vertadièr que deu estar lo de la revolucion sociala, e aquò se pòt enténer, perqué pas. Seré atau una mena de pèrda d’energia. Una pausicion neutrala suu subjècte se pòt tanben pensar, en tot saber que l’ideau libertari se bastís en dehòra de tot Estat. Cambiar d’Estat pòt estar percebut coma ni un mau ni un ben.
 
E totun cau saber que lo bronc veng de l’empach peus miaires deu Reiaume d’Espanha d’una votacion dirècte e non pas d’una eleccion. Los anarquistas cridan a qui vòu ausir que cau votar e pas jamès elegir, doncas lo referéndum deu 1-èr va meslèu dens la bona direccion, me sembla.
 
Es mauaisit de reagir pas a la vista de la Guardia Civil que va arrestar monde end’empachar una votacion. Demorar neutre me sembla dejà un exercici drin mauaisit, mes criticar pas sonque los independentistas catalans sens de díser ren suu “poch” de Rajoy se sembla un sosteng (involontari benlèu, o una aligança objectiva) a un imperialisme violent (pleonasme?).
 
L’ideau anarquista es una societat sens d’Estat. Mes l’organizacion de la societat se hè peu federalisme, es a díser la federacion de petitas entitats dambe decisions de baish en haut. Dens aqueste cas, la creacion d’un Estat catalan es una camada meslèu dens lo bon sens que non pas lo manteng deus vielhs Estats eretats deu sègle XIX-au.
 
Après, se daubrissèm lo capítol deu respècte de las culturas e de las lengas, que deu estar una cuenta tanben anarquista, i a pas nada esitacion ende saber çò que cau sosténguer.
 
La CNT-AIT de Tolosa, sens d’ac véser, se bota deu costat de l’oppressor, se definís coma una organizacion anarco-jacobina. Ataca l’occitan sens de perpausar l’usatge de l’Esperanto, çò que hè que la resulta es un sosteng totau a l’usatge deu francés, lenga impausada a milions de personas sus Tèrra dens una tòca imperialista e colonialista.