La fondacion Jean-Jaurès e lo siti Conspiracy Watch se son associats en aquesta debuta d’annada ende comandar a l’IFOP una enquista “que permeteré de hèr l’estima de la penetracion deu complotisme dens la societat”.
 
Cau saber que la fondacion Jean-Jaurès es un grop de soscadissa deu Partit Socialista miat per un cèrt Gilles Finchelstein, accessòriament director deus estudis de Havas Wordlwide, e que Conspiracy Watch es un siti fòrça conegut creat per Rudy Reichstadt, pròche tanben deu PS.
 
Las questions pertocavan a l’encòp: los vaccins, lo sida, DAESH, las societats secrètas, lo “Navèth Òrdi Mondiau”, las tralhadas deus avions, las armas climaticas, l’assassinat de JFK, la Tèrra planèra o la purmèra camada de l’òme sus la luna.
 
Segon los autors, autas questions estón pausadas ende crotzar aquestas teorias deu complòt dambe elements coma la frequéncia de consulta de l’oroscòp, l’adesion au negacionisme, au creacionisme, a la teoria deu Gran Remplaçament, deu climato-scepticisme, la hidança dens los mèdias e la cresença dens la fiabilitat de las eleccions.
 
E aquiu, esvarjada generala, la resulta es inatenduda: 79% deus interrogats cresen a, au mens, una de las teorias batejadas “deu complòt”! L’ora es grèva …
 
Puèi, la pròva es hèita qu’aderir a una teoria complotista es ligat a la votacion end’un deus partits extremistas, France Insoumise e Front National. Èra benlèu aquiu on l’enquista comandada peu PS volèva arribar, mes siam pas mauparlaires.
 
Los joens serén fòrtament, aquò’s pas una suspresa, mès “permeables” ad’aquestas teorias, levat au climato-scepticisme o a la teoria deu Gran Remplaçament de las populacions europencas per d’autas frescament arribadas.
 
Mes arriba lo moment, ende jo, mès interessant per çò qu’es de l’intencion deus organizaires d’aquesta enquista. Segon un mecanisme entre las questions (cau hornir que la responsa “se prononcia pas” èra pas perpausada, çò qu’es susprenent), l’adesion a una teoria deu complòt seré ligada a la supersticion (simbolizada aquí per la consulta de l’oroscòp) o au creacionisme.
 
La purmèra soscadissa sus aquò, es que los autors an mesclat, com de costuma, subjèctes tan diferents que non pas l’assassinat de JFK e lo hèit que la Tèrra posca estar planèra. Cresi que 99% deu monde qu’an vist lo film d’Oliver Stone pensan que la version oficiala es faussa. Dens las resultas de l’enquista, son comparats aus cresents de la Tèrra planèra. Aquò pòt influenciar los qu’an pas encara vist lo film de cap a la paur de passar per un “terraplanerista”.
 
Quala es la tòca d’una tala enquista? Ne saber mès suu monde que practican las teorias deu complòt? O hèr una mesclanha psicologica de cap aus legedors que consistís en díser: se dobtatz d’una informacion labelizada “oficiala”, sètz comparats aus aimadors d’oroscòp, aus creacionistas, aus electors extremisttas, aus negacionistas e sabi pas qué d’aute.
 
Pas nada soscadissa seriosa dens tot aquò. Lo tribalh sembla plan hèit s’espian lèu lèu, mes un còp de mès, semblaré que la volontat es de botar la vergonha a los que dobtan de l’informacion oficiala e d’estremar los que’n serén temptats.
 
Los explics deus jornalistas (es a díser 100% deus “especialistas” presents suu mèdias ende comentar l’estudi) son totis los medishes, e la formula que cadun torna díser a tira-qui-pòt e que prefèri es aquesta: “Lo complotista inventa solucions simplas a una realitat qu’es complèxa.”
 
Se soscatz dus minutas, es exactament lo contrari.