Ingredients: 8 uòus, 1 lesca de carnsalada, 1 ceba, 2 carròtas, d’alhs, vin roge, farina, jolverd, laurièr, grais d’auca, pebre e sal.
 
Preparacion: d’en primièr capolarem la carnsalada e, en acabant, pelarem e talhonarem la ceba e tres o quatre alhs. Puèi pelarem las carròtas e las talharem en rodèlas. Puèi chaplarem qualques rametas de jolverd. Quand tot serà prèst botarem un bon culhierat de grais d’auca dins una caçairòla e o daissarem sul fuòc, puslèu doç. Quand lo grais serà caud i apondrem la carnsalada e la saurengarem un pauc. Remenarem amb lo culhièr de fusta e, quand rossirà leugièrament, i apondrem las carròtas, la ceba, los alhs e lo jolverd. O bolegarem de quora en quora e, quand serà tot confit, i apondrem un culhierat de farina e la farem rossir tanben. I balharem qualques remenadas, i apondrem un litre de vin roge e farem montar lo fuòc. I apondrem una fuèlha de laurièr, salarem e pebrarem e, lo bolh pres, rebaissarem la flama e o daissarem bolhir a fuòc fòrça doç. Al cap d’aperaquí tres quarts d’ora trincarem los uòus e los metrem per dessús. Quinze minutas puèi, atudarem lo fuòc e o servirem.
 
Variantas: i podèm apondre una codena de carnsalada capolada, un parelh de pòrres, un parelh de clavèls de giròfles o un brot de ferigola. La carnsalada pòt èsser fumada. Podèm cambiar la ceba contra d’escaluènhas, la carnsalada contra una lesca de cambajon. D’unes o fan mitat vin e mitat bolhon (de carn o de galina). Dins qualques luòcs passan lo fricòt pel colador chinés, abans d’i apondre los uòus. D’unes fan bolhir los uòus dins d’aiga (amb un rajòl de vinagre), un per un, en tot passar las glairas pel dessús dels mujòls per que ne demòren cobèrts, e los meton puèi dins una caçairòla, cap a la fin de la cuècha. En Roergue d’unes càmbian la carnsalada contra de salsissòt.