Los Monuments nacionals (franceses) anóncian una manifestacion Cortesia per la dimenjada de Pascas a la Ciutat de Carcassona. Pensatz que se cal regaudir d’una mesa en abans (per un còp) dins lo castèl dels Trencavèls dels trobadors e d’aquesta nocion de Cortesia (aquelas règlas de vida en societat e de relacion entre los òmes e las femnas) qu’amb Larguesa, Prètz, Jòi fa part de lor messatge d’amor?
 
Lo regaudiment serà de plan corta durada quand comprendretz que lo contengut de las animacions a res de veire amb los trobadors e la Cortesia: s’agís, de fait, de mostrar una sala d’armas medievala e de presentar las tecnicas de combat del sègle 13! Atal “los chivalièrs treparàn lo castèl e prendràn lor torn de garda”. A-n-aquel moment, benlèu que la poësia medievala occitana se transformarà en cants de soldats e de guèrra! Qun tristum: contra-sens istoric? non-sens cultural? peis d’abril un pauc poirit? travestiment del passat? mesprètz per la lenga e la cultura d’Òc amb un sol mot (desvirat) per faire local e exotic?