Ja an arribat es prumères donacions tà amiar a tèrme un des projèctes mès polidi dera sason d’estiu d’enguan: era entronizacion der imatge de Sant Ròc ena glèisa de Santa Maria de Vilamòs (Val d’Aran).
 
Est'an passat era Associacion Es Paums compausèc e interpretèc es Gòis en aunor deth Gloriós Sant Ròc en aranés[1].
 
Enguan que volem dar un  aute pas mès endauant e volem plaçar un imatge deth Sant en un autar dera glèisa. Entronizar que s’en ditz dera ceremònia liturgica[2]. Era talha, d'apuprètz ueitanta centimètres de nautada, serie entronizada eth 15 d’agost d’enguan pendent era Missa dera Hèsta Major.
 
Tot aquerò pr’amor de recuperar era anciana tradicion deth Cant des Gòis, ua manifestacion culturau desapareishuda hè ans.
 
Eth projècte compde damb eth supòrt der Archiprestrat d’Aran, ser Ajuntament de Vilamòs e seth Conselh Generau d’Aran. Totun, cercam qu’ era part pus grana dera financiacion deth projècte arribe de donacions de particulars, entad’aquerò ja ei dubèrta ua campanha de micromecenatge ena plataforma de finançament collectiu Tot Suma.
 
Es mecenes que i participen, a compdar de 5 èuros, arreceberànen escambi diuèrses recompenses, segons er impòrt dera sua aportacion[3]. Es recompenses que serán  balhades as donants eth dia dera entronizacion o dempús dera hèsta ena sedença dera Associacion en Vilamòs.
 
Aguest qu’ei un des actes previsti, mès ja èm en tot trebalhar ena Programacion dera Associacion entad’aguest estiu. A saber: Tiò, Cultura e Natura un concurs de fotografia, Lairissa Bike ua corsa populara de BTT, IIIau Torneg de Tènnis de Taula, Missa cantada en aranés, Matinaus Musicaus ena Residéncia, Concèrt en Musèu dera Corau Es Paoesses e dedicación dera Plaça ath Venerable Pare Joan de Vilamòs.
 
Peth moment era Campanha de Micromecenatge, qu’a auut ua bona responsa, auem donants deth pòble, mès tanben dera Val, dera rèsta d'Occitània, de Catalonha e d’Espanha.
 
Totun, encara auem de besonh mès mecenes. Participa-i e eth tòn nòm, eth dera tua casa o eth dera tua familha demoraràn escriti tà tostemps enes planes d’aguest episòdi dera istòria deth pòble mès antic e mès polit[4].
 
Es donacions se pòden hèr per virament bancari, targeta de credit o en moneda.
 
Mès informacion, espaums@gma...