1) Un conservatòri interactiu
 
Auriá una foncion de memòria per numerizar, mostrar e situar dins l’istòria economica e politica locala, interregionala, latina e mediterranèa las colleccions d’art e artisanat de la region de Tolosa, uèi dispersadas e entrepausadas dins de resèrvas.
 
2) Un observatòri interactiu sul tèma de la frontièra e de las lengas:
 
Auriá una foncion de reflexion e exposicion subre l’istòria de la frontièra politica pirenenca, sas implicacions, sas consequéncias, en relacion amb las autras “frontièras” europèas. Tractariá tanben de las temptacions del replegament e del nacionalisme tan coma del despassament de la frontièra.
 
Auriá tanben una foncion de reflexion e exposicion subre la minorizacion de las lengas e de las culturas, sas implicacions, sas consequéncias, sens oblidar lo dangièr del barrament, de la dilucion e de la disparicion. Seriá una contribucion a la diversitat del planeta e a la democratizacion dels Estats. Tractariá de question tal coma l’apertenéncia a una comunautat e la libertat individuala.
 
3) Un laboratòri interactiu d’idèas e d’experiéncias
 
Auriá una foncion de creativitat economica, culturala e sociala a partir de la coneissença de la complexitat culturala e linguistica de la societat. Auriá tanben una foncion de contribucion al desvolopament economic per la complicitat que pòdon crear la lenga e la cultura occitanas en Enropa e al torn de la Mediterranèa en s’apiejant sul ròtle de Tolosa coma davant-pòrt de Barcelona, coma ciutat de l’Aeropostale cap a l’Africa e l’America del Sud e coma sèti de l’Aerospaciala.

1. un collègi bilingüa o Calandreta francés-occitan amb un estudi enfortit de las autras lengas latinas, qu’assegurariá la seguida de las escolas elementàrias  bilingüa o Calandreta de l’aglomeracion tolosana en partenariat amb lo rectorat e lo Conselh Departemental.
 
2. un centre de documentacion modèrne e interactiu que posca abrigar la bibliotèca seculara del “Collègi d’Occitània” en partenariat amb lo CIRDOC, l’INOC e las bibliotècas de Tolosa per permetre la consultacion e lo prèst mas tanben d’estudis fondamentals subre la literatura, aital coma la formacion per  los adultes. Auriá una sala d’exposicion ont serián aculhits sistematicament las lengas e culturas europèas o mediterranèas amb una lenga valorizada cada trimèstre per suscitar d’escambis, de comparasons, per crear de ligam.
 
3. un espaci de creacion e de difusion: salas de repeticion, salas interactivas de trabalh mediatic (ràdio, television, internet), estùdio e bancs de montatge, aital qu’una sala d’espectacle de 500 plaças par lo teatre, lo cinema, la dança...
 
4. un lòc de memòria e de prospectiva de las arts e tradicions popularas d’Occitània ont serián recampadas las colleccions actualament insufisentament expausadas tal coma la del musèu Paul Dupuy. Abrigariá tanben de salas exposicions dinamicas aptas a insuflar la creacion: porcelana de Martra Tolosana, jòias, decoracion e mòbles, costumes e mòda (a partir de la colleccion de costumes istorics de Françoise Dague).