A l'anciana
 
Avem decidit d'aver lo balon
L'uòu
La veishiga
Una ponhada a l'arbitra
Una autra a l'adversari
Al capitani d'un club als dos Brennus
Que jamai auriam pas degut rescontrar
Mas bon, lo professionalisme, la volontat de la Federacion de far del rugbi un espòrt nacional, nòstra capitada de vilòta calma per familhas urosas
Son tombats de doas divisions e nautres, suspresa, sem montats
Soi tornat al vestiari
Camfre, estrap e vaselina
Trucs e tumadas
Los de davant aviam decidit de demorar, de sortir pas
Los autres tornèron
Cinc minutas e serà ora d'i anar
Bufadìs, agach, musica dels crampons sul sòl
Dins lo corredor que mena al pelenc, lo braç quilhat, decidiguèri d'arrestar la progression de mos òmes
Los adversaris corrèron al dintre de l'estadi
Bronca e shiulada
Doas o tres minutas d'aquel arcuèlh e foguèt a nosautres de dintrar sul terrenh
Bramadìs, còrna de bruma e aplaus
Las tribunas son comolas
Los pesatges tanben
Res non val l'electrochòc d'un derby a casa contra la vila grandarassa d'a costat
I aguèt de mots dins la premsa locala
Lo tresorièr es content
La veishiga es al centre
Lo mièg de dobertura fa tres passes en arrèr
Es a mand de butar
Manda una quilha que s'acaba dins las tribunas
Ja los uèch de davant formam una mesclanha al centre del terrenh
Los adversaris s'avançan
Las tribunas grasisson
Dins un monde onte tot es a cambiar, de biaisses demòran
Avem decididit d'aviar la sason
Aital
A la mòda vielha
 
 
 
 
Cissonet