Sénher Turull,

Fa qualques setmanas que comencèri per Jornalet una tièra, çò es una sèria, d'articles d'opinion occitans jos la forma de letras als presonièrs politics e exiliats catalans, coma l'expression que cresi normala d'una solidaritat amb de femnas e d'òmes desseparats injustament dels sieus per una justícia que ne pòrta solament lo nom. Quand entamenèri aquesta tièra, sabiái pas que quatre de vosautres començeratz una cauma de la fam per vos defendre dels blocatges judiciaris del Tribunal Constitucional espanhòl. Per tant, en mai de ma solidaritat de defensor dels dreches dels pòbles, vos disi, en escrivent aquestas linhas uèi, mon chepic, çò es ma preocupacion, per vòstra vida que sètz a riscar per una causa que deuriá semblar justa a totes los democratas. Prègui que devengan umans los jutges que vos empenhon per lor volontat arbitrària a far perilhar vòstra existéncia.

En Occitània d'ont vos escrivi, Occitània francesa pels malastres de l'istòria qu'an assimilitadas nòstras lenga e cultura al destin crusèl d'un estat que las mesprèsan, pauques vos coneisson. Es verai que semblatz d'aver una personalitat umila e discreta qu'es lo pròpri de las bonas personas. E aquela meteissa umilitat vos empenhèt a acceptar, en març passat, d'èsser candidat a la presidéncia de la Generalitat, après que lo president Torrent aguèt cedit a Espanha en permetent pas l'investidura de Carles Puigdemont, e que Jordi Sànchez, que vos acampanha ara dins la meteissa espròva, aguèt pas pogut sortir de preson.

Me recòrdi d'aquel jorn. Sabiatz qu'anàvetz tornar en preson dos jorns après mas, ça que la, prononcièretz vòstre discors amb tranquillitat e dignitat, davant lo mesprètz dels partits carcerièrs. Vos demandarai de me desencusar, qu'aquel jorn cresi que comprenguèri pas vòstra dignitat tranquilla, vos volguèri mai dur envèrs Espanha, mas cresi qu'aviatz rason, coma aguèron tòrt, çò'm par, los deputats de la CUP que per ideologia vos donèron pas lor supòrt. L'umanitat e l'unitat valon fòrça mai que l'ideologia.

En pregant per vòstra libertat e sustot per vòstra vida, vos mandi la fòrta abraçada solidària d'un òme que non coneissètz pas mas que lucha amb vos e tanben amb vosautres, Jordi Sànchez, Quim Forn e Josep Rull. Vòstra dignitat demòstra l'indignitat de l'estat espanhòl.