Me desencusaretz se vos escrivi collectivament, mas me'n pensi autorizat per çò que foguèt durant longtemps ma cresença. Me creguèri d'efièch un dels vòstres, o quasi dels vòstres. Mon paire, europèu nascut en Algèria, s'es agut sentit espanhòl, perque pensava tals sos ancessors malhorquins. Encara uèi s'identifica mai a la Roja qu'a l'esquipa de fotbòl francesa, e volguèt un temps demandar lo ciutadanatge de vòstre país. A ieu m'agradèt tant d'aprene lo castelhan que somièri, a l'adolescéncia, d'escriure de libres en espanhòl, malgrat que ma practica ne siá mendre a l'ora d'ara. Quand me gandissi en Catalonha, m'i exprimissi mai sovent en catalan e occitan qu'en lenga vòstra, e se redigissi aquesta letra en occitan, o comprendretz, de segur, que la Catalonha que pensatz vòstra li'n reconeis l'oficialitat.

Espanhòls, vos reconeissi pas pus. De biais ninòi, cresiái qu'aviatz daissat endarrièr los ans sornes de la dictatura mesa en plaça per la brutalitat del nazifaissisme e la covardia de las democracias occidentalas, qu'anàvetz amb orguèlh devèrs l'aplicacion serena dels principis democratics, que fasiatz partida de las nacions que desiran d'avançar. Ciutadan francés de tres lengas e culturas non francesas, l'occitana, la catalana e la còrsa, vos admiravi: èra possible en cò vòstre çò que França non pòt pas acceptar: daissatz a vòstras minoritats nacionalas la possibilitat d'aver lors lengas oficialas sus lors territòris, de n'organizar l'ensenhament, de las emplegar liurament a la television.  Per aver tot aquò, occitan, catalan e còrs, ai de luchar cada jorn amb mos compatriòtas.

Mas que vesi, uèi? Avètz de presonièrs politics, d'exiliats politics, e mai un rapaire, Valtònyc, s'es refugiat en Belgica; el per aver criticat la monarquia; los autres per aver participat a un referendum exigit pel pòble catalan. Ont an passat las valors democraticas per las qualas la mitat d'Espanha patiguèt fòrça? Mentretant, de violaires son en libertat amb l'indulgéncia dobla dels jutges e de la lei, coma s'aquel terrible acte de violéncia sexuala foguèsse pas un crime grèu! Entre vosautres fòrça avètz conegut l'autoritarisme nacionalcatolic, durant gaireben 40 ans, mas avètz tres nuanças d'extrèma drecha, lo PP, Ciutadans e Vox, que poirián prene lo poder a Madrid coma ja govèrnan a Sevilha, mentre que los "socialistas" semblan d'aver abandonat totas lors luchas d'abans: adieu, progrès social; adieu, autodeterminacion dels pòbles; adieu, republica; adieu, democracia!

Catalonha vos destorba, e crenhètz de pèrdre una de las regions mai ricas de vòstre país? Alavetz, perqué cercatz de comandar solament amb la repression e non pas amb l'adesion volontària dels catalans? Los canadencs son estats mai intelligents amb los quebequeses, en daissant la lenga francesa liura a Ottawa, en los mespresant pas pus, en renonciant a l'usatge de la fòrça e de las menaças coma solets mejans politics. Vos cresètz mèstres de Catalonha amb vòstres policièrs e vòstres jutges? Se los catalans quitan de creire en Espanha, vòstras fortalesas non seràn pus que castèls de cartas e de sabla.

Se de verai aimatz vòstre país, daissetz pas los assassins de Lorca governar vòstra ment e vòstre còr.