Auretz notat, çò'm par, que fau servir dins lo títol la primièra persona del plural. Me permetrai pas de far l'aleiçonaire, e partissi de mon experiéncia personala sens brica m'exclure de las criticas o suggestions que farai.

D'efièch, foguèri un comentator quasi compulsiu de Jornalet, a tòrt persuadit, e perdut per un orguèlh narcissic, que mos comentaris serián utils o farián avançar la reflexion collectiva. Totun, se tota idèa pòt contribuir al debat, tròp escriure se resumís a desparlar, e ara que fau una cronica setmanièra, intervenir dins los comentaris seriá m'autrejar un privilègi mentre que los correspondents, eles, an sonque los comentaris per s'exprimir. Son pas opinants coma ieu.

Doncas, dempuèi qualque temps, comenti pas pus gaire e ma tòca es de comentar pas pus, puèi que ja teni un mejan d'expression sufisent. 

I a mai d'una mena de comentaris. D'unes son de comentaris lingüistics, que provòcan de còps de reaccions afogadas: s'es una question sul modèl lingüistic del jornal, val mai de la pausar a la redaccion o a ieu coma corrector. Mai generalament, totes los opinants lor podèm escriure a partir de lors paginas o de lors articles en clicant sus "Contactar l'autor". Me pareis un melhor procediment que l'interpelacion per un comentari, qu'obliga l'autor de respondre el tanben per comentari, çò qu'es contrari a la nòrma de la premsa en linha.  Se se tracta, totun, de completar un article en donant una informacion utila, son evidentament benvenguts, e mai necessaris. Tanben, es normal de poder donar son vejaire sus tal o tal tèma. Aquò demòstra que la lenga nòstra es encara viva, e qu'en occitan se pòt parlar de tot. Per contra, dins un debat, que servís de tornar dire milanta còps una meteissa idèa? Riscam de venir (e de far venir) de tròls, e la discussion se tresmuda en garrolha, pauc productiva coma totas las batèstas verbalas, e mai lo legeire intelligent sàpia triar çò que li adutz quicòm de çò qu'es expression d'una volontat de poirir lo debat. Es per aquò que sovent l'actitud mai serena e eficaça es simplament d'ignorar los comentaris, en i respondent pas, mas en se reservant pasmens la possibilitat d'avisar la redaccion d'excèsses (insultes, difamacion, devises racistas o sexistas).

Comentem se volèm, mas comentem melhor.

E doblidem pas que son pas los comentaris que rebaton la redaccion de Jornalet ni los opinants. Comentem melhor, mas legiscam mai nòstre jornal.

Qu'a de besonh de nosautres. Coma president dels Amics de Jornalet, m'assòcii a la demanda de solidaritat per l'an que ja s'acèrca. Es a l'imatge de la lenga nòstra: freule mas fòrt de nòstra volontat de viure e de far viure!