L’aviái ausit a la lèsta a una ràdio e soi anat verificar. Atal un rapòrt dau Senat o confirma: las associacions an perdut 15 miliards d’èuros en 10 ans. Es astronomic! Mas de que son las associacions? Son lo luòc de l’iniciativa sociala, lo laboratòri de recèrca e d’experimentacion societala. Las associacions dobrisson de dralhas, que detèctan los besonhs de la societat. Mantunas d’aquelas inciativas faràn chi, coma per las entrepresas que n’i a un fum que capitan pas amor que trapon pas un mercat. Mas n’i a fòrça qu’an reüssit e fach espelir mantunas politicas publicas plan justificadas e tanben creat de mercats economics. Capitadas en pagalha, e pas per de pichòtas causas. La Seguretat Sociala ven de las primièiras mutualas obrièiras dau sègle 19. Mai pròche de nautres tot çò que se maina de l’andicap es d’origina associativa. Atal lo seguit dels escolans a la pena, l’accion per la cultura, la libertat e la diversitat de la ràdio, per l’ecologia, per las lengas regionalas... Aquò a forra-borra per quauques exemples d’una tièra infinida. Amb aquela baissa dramatica de sosten nòstre país escagassa son sector de recèrca e d’innovacion societala, sas “start-up” dau melhor viure en societat. Estalviar en tot arroïnant l’innovacion societala es una politica d’avenidor?