Son de la mena dels panelhets catalans, aquestes los fan los provençals, recobèrts de pinhons. S’aprèstan amb una basa d’amètla mòlta e de sucre, mas contenon tanben de confitura d’albricòt, o d’irange, qu’i balha fòrça sabor. La preparacion es semblabla a la dels panelhets catalans: cal barrejar l’amètla amb la confitura, lo sucre en posca e un parelh de mujòls; en acabant, s’i apond las glàrias montadas en nèu. Puèi s’i fa de bòlas de la pagèla d’una notz, se ròdan per l’uòu batut e se recobrisson amb de pinhons. Fin finala, s’enfornan, solament qualques minutas, e se daissan refregir. Son un lepetitge plan desirable; de luxe, tot amètla e pinhons.
 
 
Pinhonat
 
Ingredients: 500 g d’ametla mòlta, 3 uòus, 150 g de confitura d’albricòt, 150 g de sucre en posca e pinhons.
 
Preparacion: d’en primièr, montarem doas glàrias en nèu. En acabant, botarem l’amètla dins una escudèla, i apondrem los dos mujòls, la confitura e lo sucre e o remenarem fins a ne tirar una pasta espessa. I apondrem alavetz las glàrias pauc a cha pauc, o tornarem remenar e ne farem de bòlas de la pagèla d’una notz. Puèi batrem l’uòu restant e, après, metrem los pinhons dins una sièta. Quand tot serà prèst passarem las bòlas per l’uòu batut e, seguidament pels pinhons, fins que ne sián plan cobèrtas. Las metrem fin finala dins un tian (oliat o enfarinat) e las enfornarem, a 220º. Al cap de set o uèch minutas las trairem e las daissarem refregir.
 
Variantas: la confitura pòt èsser d’irange. D’unes o fan tot sucre, que cal fondre prèviament amb un pauc d’aiga; alavetz s’i apond un culhierat d’aiganafa; d’autres tanben i apondon un pauc de farina; per aquel cas d’unes fan de cairats de pasta e los crespan en forma de creissent.