Opinion
“Tapas” d’occitan
Las revistas literàrias son a la literatura çò que las “tapas” espanhòlas son a la restauracion. Un biais de tastar de tot, de faire de fantasiás gustativas sens se conflar. S’i trapa de tot, novèlas e poesias, criticas, fulhetons, amai mai. Lo tot d’autors plan coneguts o tots novèls. An una autra qualitat: vielhissan pas, son tostemps regalantas. Es una diferença bèla amb las revistas de debat ligadas a l’actualitat. Un poèma bèl es etèrne coma un tèxte bèl. Ne trapar subran un, es coma lo delici d’una majofa sauvatja trapada per camin. Aquelas revistas son los laboratoris de la literatura d’una lenga, amor que los autors joves i fan sas primièiras publicacions. Per aquò son mai que preciosas, indispensablas. En occitan n’avèm tres portadas per de fonduts de lenga e de literatura. Son de nauta qualitat e chucosas. La mai anciana es Reclams creada en 1897. Es gascona mas dobèrta a totes los parlars d’òc. Per internet es la mai modèrna que dona de legir en linha. Avèm tanben la revista Òc de grand prestigi istoric. Es la mai poetica e fòrça dobèrta a las autras lengas. Enfin Lo Gai Saber de l’Escòla Mondina de Tolosa. Se definís coma revista culturala e publica d’articles pro variats, de la tradicion umanista que bota la sciéncia dins la cultura. Las librariás tampadas, podètz pasmens comandar de bona escritura d’òc que La Poste mancarà pas de vos portar. Plegarem pas macarèl!
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#1 Adiu Johnny
Donc la revista Reclams qui animi despuish uas quantas annadas dab Maurici Romieu, Joan Luc Landi, Eric Gonzales, e plan d'autes, que s'auré perdut l'eslama e lo son nivèu que seré hèra baish. Perqué non ? Mes condamnar shens instruíser e jutjar — qu'ei a díser portar las pròvas qui permeteràn a la jurada o au jutge de comdamnar a de bonas — que relhèva de l'acús shens pròva o tà estar drin provocator de la difamacion... Donc, puish-a qu'ès mèste deu cèu e de la tèrra occitana e de la soa produccion literària qui s'exprimeish tanben, per çò de Gasconha, dens los Reclams, qu'as de'ns portar las pròvas de çò qui dises. Senon, que serà com un còp de berret sus l'esquia de l'aso, com ac ditz l'arreproèr. Qu'ei a díser arren de seriós,
sustot per ua ombra qui s'escon darrèr un chafre.
Sèrgi Javaloyès, Capredactor de la revista Reclams.
Tot çò que ditz aquí Joan-Loís Blenet me sembla aquí positiu, equilibrat, just, senut e justificat. Qui es pro nèci per "jogar" a lo notar sonque "una estela", coma se tot çò que disiá foguèsse necitge ???
Lo Diari non es una revista literària, mas un (polit) butletin cultural, çò que non èra lo subjècte aquí abordat.
"Gai saber que perpausa ua mesclanha occitano-lengadociana inacceptable" ? Abans de parlar d'un contengut literari, o cal legir. E personalament, tròbi ieu que la nocion de "mesclanha occitano-lengacociana" conten una fòrta propension al racisme nèci e indigne de la cultura occitana, que dins Gai Saber coma endacòm mai, s'espandí plan segur de Còni e de Guàrdia Piemontese a Baiona e de Gueret a Leucata, per non pas dire, segon mon còr, de Gueret a Guardamar…
#4 Sètz segur d'aver ja legit Lo Diari? I se parla pas brica de l'actualitat de l'IEO (mentre qu'es facha per una seccion regionala d'aquela associacion), es una revista plan dobèrta! I avètz de cronicas que parlan de jòcs vidèos, de cosina, de sciéncia e patin cofin. Los e las que contribuisson al Diari son joves, aquò càmbia de las vièlhas caras de l'occitanisme... Per ieu, son pas de militants e lo ton es pas brica militant o aleiçonaire.
Ieu tròbi lo diari tròp occitano-occitanista, fach pels militants, pas mai.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari