Ingredients: 200 g de farina, 200 g de patanas, 1 uòu, formatge blau (sassenage), formatge raspat (gruièra, parmesan, edam), pebre, 100 g de lard e sal.
 
Preparacion: d’en primièr metrem las patanas dins una ola, las cobrirem d’aiga e las daissarem sul fuòc. Lo bolh pres, rebaissarem la flama e o daissarem bolhir a fuòc doç. Al cap d’aperaquí trenta minutas tirarem l’ola del fuòc, n’escamparem l’aiga e daissarem las patanas dins un estorridor. Quand seràn refregidas, las pelarem e las passarem per la passadoira. En acabant, las metrem dins una bacina, i apondrem la farina e l’uòu e o salarem e pebrarem. En seguida, o pastarem fins a ne tirar una massa que se desempegarà dels dets, e ne farem après de bòlas de la pagèla d’un uòu. Amb la palma de la man farem rodar las bòlas fins que ne resulte un cilindre coma un gredon mas un pauc mai fin. Los talharem alavetz a bocins d’un det e mièg de long e seguidament i farem la forma crespada d’una virgula. Quand seràn totes aprestats, botarem fòrça aiga dins una ola e la daissarem sul fuòc. O salarem e, lo bolh pres, i metrem los crosets. Quand tornarà levar lo bolh, rebaissarem la flama e o daissarem bolhir a fuòc doç. Al cap d’aperaquí cinc minutas los trairem e n’escamparem l’aiga. En seguida, oncharem amb de lard una caçòla e i metrem un lièch de crosets. Los empolverarem amb de formatge raspat, ne metrem un autre tet, los tornarem empolverar amb de formatge e aital fins que s’acaben e i metrem la darrièra sisa de formatge. Fondrem fin finala lo lard, n’asagarem los crosets e los enfornarem, a 200º. Los trairem al cap d’aperaquí vint minutas, quora seràn daurats un pauc per dessús.
 
Variantas: podèm cambiar lo lard per de noses o de burre (la pasta pòt tanben conténer un rag d’òli de noses). D’unes los bolhisson amb de bolhon de carn. D’autres s’esparnhan lo formatge blau. Per qualques luòcs i balhan pas cap de forma als bocins. Podèm assasonar los crosets amb de formatge blau e de gruièra, mitat e mitat.
 

Ingredients: 300 g de farina de segal, 40 g de levam, formatge raspat (de feda), burre e sal.
 
Preparacion: per començar dissolverem lo levam en tres quarts de veirat d’aiga tebesa e o abocarem en una bacina. I apondrem la farina, o salarem e o pastarem fins a ne tirar una massa que se desempegarà dels dets (se cal, i apondrem un pauc mai d’aiga o de farina). En acabant o cobrirem amb de servietas e o daissarem s’amolir per espaci de tres o quatre oras. Quand serà amolit, o tornarem pastar e ne farem de bòlas de la pagèla d’un uòu, de bòlas que farem rodar amb la palma de la man fins que ne resulten de bastonets d’un centimètre d’espessor. Talharem alavetz los bastonets a bocins d’un centimètre de longor e, amb lo poce, los espotirem gaireben de tot en tot. Quand seràn aprestats, metrem fòrça aiga dins una ola e la daissarem sul fuòc. O salarem e, lo bolh pres, i metrem los crosets. Quand tornarà levar lo bolh, rebaissarem la flama e o daissarem bolhir a fuòc doç. Al cap de tres o quatre minutas, quand seràn cuèches, trairem l’ola del fuòc, n’escamparem l’aiga e los metrem sus la sièta. Enfin, los empolverarem amb lo formatge, los asagarem de burre fondut e los portarem a taula.

Dins la Val d’Estura los assasonan amb de banha grisa (e son “crosets amb de banha grisa”, segur): saurengarem amb de burre una ceba chaplada, i apondrem mièg litre de lach, qualques bocins de formatge e un pauc de pebre e o daissarem bolhir a fuòc doç per espaci d’aperaquí dètz minutas.
 
Dins las vals del sud d’unes los fan mitat farina (de blat) e mitat patana bolhida. O pastarem, ne farem de cordons, los talharem d’una longor d’un centimètre e mièg, los espotirem amb lo poce, los farem bolhir e los daissarem dins un estorridor. Metrem puèi un bocin de burre dins una padena, i saurengarem un pòrre (chaplat), i apondrem un veirat de crèma, o salarem e, lo bolh pres, i metrem los crosets. O daissarem bolhir a fuòc doç per espaci de dos o tres minutas e o servirem.
 
Dins la Val Grana tanben ne fan amb de farina (de blat) e de patana bolhida. O pastarem, ne farem de cordons, los coparem a talhs d’aperaquí dos centimètres, los espotirem amb la poncha de la forqueta, los farem bolhir e los metrem sus un plat. En acabant fondrem un bocin de burre dins una padena, i apondrem un veirat de crèma e cent gramas de formatge de Chastèlmanh (bricalhat), o salarem, daissarem que lève lo bolh e assasonarem amb aquò los crosets.