Enfin s'es acabat lo suspens: Joe Biden a vencut Donald Trump, en ganhant pro de grands electors amb los vòtes favorables de Pensilvània e Nevada. Es de mal creire que dins la primièra poténcia mondiala una eleccion prenga tant de sens, mas fòrça mond veson amb solaç l'eleccion del democrata. Que òc, la capitala del mond occidental es Washington, que nos agrade o non.

Coma èra de preveire, pasmens, Trump reconeis pas encara sa desfacha, en apondent a sos defauts lo de marrit perdeire,  e aquò confirma de qué se tractava. Ai pas de grands espèrs en lo moderat Biden mas constati que pel primièr còp una femna, en mai d'aquò mestissada (d'originas jamaicanas e tamolas), sa vicepresidenta Kamala Harris, pòt accedir a la presidéncia dels Estats Units, e, mai que mai, coma fòrça mond, vesiái coma una menaça una reeleccion de Trump. Per fòrça caires, lo miliardari politician revèrta un palhassa, amb sas engaunhadas grotescas, mas sens èsser l'esglasiant de Stephen King, fa paur. Fa paur perque quita pas de mentir; fa paur perque son caractèr sens contraròtle es un perilh per la patz mondiala; fa paur perque a passat tota sa presidéncia a rebutar tot esfòrç, totun urgent, per luchar contra lo cambiament climatic que pòt destruire l'umanitat; fa paur perque lo sostenon una eteroclita coalicion de climatosceptics, de conspiracionistas, de reaccionaris antisocials, de fanatics crestians, de racistas e masclistas revenjaires, e de las extrèmas drechas europèas que trabalhan al servici del caos per installar un nòu òrdre opressiu.

E cossí l'an vencut, aquel mostre de mila caras? En cresent en las fòrças del vòte, en anant votar mentre qu'el fasiá servir la paur del coronavirus, descadenat dins son país per sa negligéncia, en pretendent que los vòtes per correspondéncia avián pas de valor legala. 

Uèi, un enemic de la democracia a perdut per mejan de las fòrças de la democracia. La sabi fòrça imperfiècha, la democracia estatsunidenca, mas es ça que la una nòva encoratjanta per cedir pas a l'ànsia e contunhar de luchar.

Aqueste ser, lo mot democrata demòstra que son sens plen e concret nos enlusís, mentre que se confirma que republican vòl pas dire grand causa, e que darrièr el, de còps que i a, s'escondon d'enemics de la libertat, dins fòrça païses.

Aqueste ser, torni afortir que preferissi la luminosa democracia a la sorna republica.