Dins lo 7/9 d’un matin, desgrunèron una tièra de sicuts que nos poirián far dobtar de la nòstra umanitat. I faguèron lo punt sus l’exploracion de las prigondors abissalas, que la lutz del solelh i arriba pas, e que la vida i es escassa mas presenta. Apreniam que s’èra estudiada la possibilitat de far, d’aquelas prigondors, un cementèri de rebuts radioactius, mas que los corrents bolegant aquelas aigas aurián escampilhats. Ça que la, la preséncia de minerals, dins aquel espandi verge, atissa ja las cobesiás.

 

Seguiguèt un pauc mai tard lo biais d’organizar la distribucion dels vaccins anti covit. Los convòis ne serián securizats per los aparar de desviaments, siá per de mafioses que ne farián un mercat parallèl o que los tornarián desliurar contra de rescats, siá per de gropes anti-vaccin que los destrusirián. Disián tanben que la China, un temps botada al ban de la societat mondiala, se convertissiá a l’umanitari en distribuissent vaccins a de países paures. Mas, ajustavan los jornalistas, èra tanben per afortir la siá empresa comerciala sus eles.

 

Parlèron aprèp del desenat de milions de personas que patisson ara de la talen e de la malnutricion dins lo nòstre país, que aparten als mai rics de la planeta, e que s’i degalha, cada an, detz milions de tonas d’aliments.

 

La bona novèla venguèt dins lo sicut seguent : la robotica fasiá de progrèsses espectaculars dins la melhorament dels ligams entre l’èsser uman e la maquina, e l’intimitat entre eles èra a créisser. Lèu l’assistent vocal serà capable de simular las emocions, mas tanben de reconéisser las expressions emocionalas de l’uman, e sustot de las analisar, de las compréner e de rasonar a partir d’elas.

 

Aital, es pas la pena de se carcanhar : se sèm a pèrdre la nòstra umanitat, las maquinas las salvagardaràn.