S’i a una batèsta de ganhar ara, es plan la de la preséncia sus la telaranha. E cresi que cadun n’es plan conscient. 
 
Am aviat l’accion “.OCC” per aver noms de maines pròpris, lo Congrés trabalh fòrça plan sus, ara, un sistèma de reconeishença vocala, lo Gabrièu Pelisson anima vidèos sus YouTube per aprénguer la lenga, las causas se botan en plaça pauc a pauc.
 
De mon costat èi temptar un quicomet sus Face Book, en prénguer exemple sus causas e qu’existissen dejà per d’autas lengas que seguissi. Tot a començat lo purmèr de junh de 2020 quan èi lançat una pagina que s’apèra NI LERNAS LA OKCITANAN (Aprenguèm l’occitan) e que s’adreça a esperantistas que’s podon interessar a la lenga nòsta. 
 
La formula es simplòta: una frasa en occitan cada jorn, se pòt abonar e atau mancar pas un episòdi, dambe la prononciacion e la revirada escritas. A la debuta, botavi tanben una vidèo cada 20 jorns on prononciavi las frasas, mes lèu lo sistèma refusèc de’n recéber mès e n’i pas que 4. Lo monde qu’espian podon pausar una question devath la publicacion e aquò es fòrça practic.
 
Per astre, aqueras publicacions se podon programar, pas besonh de picar una frasa cada jorn.
 
Vam arribar lèu aus 9 meses e las estatisticas muishan qu’i a 190 abonats. A cada còp, lo nombre de “personas pertocadas” (sabi pas exactament çò qu’aquò vòu díser) vira a l’entorn de 10. 
 
Doncas imaginatz una classa de 10 aprenents, es pas tròp mau.
 
Puèi lo 1èr de seteme èi encadenat dambe la medisha causa en francés, una pagina entitolada UNE PHRASE D’OCCITAN PAR JOUR. De notar que las frasas son las medishas , mes solide la prononciacion e la revirada son diferentas. E aquiu, las estatisticas son diferentas. 
 
La pagina compta 554 abonats e generalament lo nombre de “personas pertocadas” tremoleja entre 400 e 500, dambe una punta de vistas a 3117 lo 4 de seteme e la frasa “Va plan?”. Benlèu aquò vòu díser que monde qu’an recebut aquesta publicacion l’an tornat mandar a d’amics dambe los quaus s’escambian la frasa. 
 
Doncas cau imaginar una sala de classa dambe 400 escolans, es una resulta de las bonas. 
 
Solide aquò va pas balhar locutors de prumèra, mes au mens cresi que va manténguer l’interés per la lenga d’un biaish ludic a monde que’s passejan sovent sus la telaranha.
 
Haram un bilanç mès precís après un an.