Lo diluns 22 de Febrièr, la decision presa, a Lion, de servir dins las cantinas escolaras pas qu’un menut unenc, sens carn, enferoniguèt tot lo mitan politic de l’Exagòn.
 
La Dreita denoncièt “una causida sectària, una temptativa totalitària d’un corrent de pensada que vòl impausar las siás opcions a totes per la constrencha”. Lo Ministre de l’Interior i vegèt “un insult inacceptabla als agricultors e als boquièrs franceses”.
 
Pr’aquò, segond l’O.M.S. lo consum excessiu de carn e productes laitièrs entraina problèmas de subrepés e d’obesitat pels mainatges; las carns transformadas e las rojas serián cancerigènas; lo noirissatge, productor de gases a efècte de sèrra es dangierós per la planeta; per aquelas rasons es urgent de redusir lo consum de la carn.
 
Per un nutricionista, un objectiu de la cantina escolara es de dobrir lo gost dels mainatges e de los sensibilizar al rapòrt entre alimentacion e santat. Dins aquela amira, una lei, dempuèi lo 01 de novembre de 2019, obliga totas las cantinas escolaras a prepausar un menut vegetarian, un còp per setmana.
 
Mas m’avisèri, en escotant sòcis de la municipalitat de Lion, qu’aquela mesura èra temporària, botada en plaça pas que per facilitar lo servici dels repaisses en periòde de crisi sanitària. E fasián remarcar qu’èra pas un menut “vegetarian” qu’impausavan, pr’amor que servissián uòus e peish.
 
Mas, ajustèron, fa un an, dins la meteissa vila e per las meteissas rasons, la meteissa mesura foguèt presa pel Conse, que, a’n aquel moment aparteniá a la majoritat presidenciala, e que, a l’epòca, digús i aviá pas trapat res a dire.
 
E me pensèri que uèi, los repotegaires que acusan los elegits lioneses de “botar d’ideologia dins l’escudèla dels mainatges”, i vuidan, eles, de sopa politicaira.