Claudina Delpont es una amiga esportiva nascuda a Pesenàs fa vint e cinc ans, trabalha dempuèi dos ans al ministèri de las talhas dins lo 77. Demòra a Samois sus Sèina —Rota de l’Agaric— dins un ostalet enrodat d’una cort bèla coma la mitat d’un terrenc de tennis. Per temps polit coma per temps marrit, Claudina fa sos 20 kms cada matin mas fa pas de “running” ditz simplament que “corrís”.
 
Cada dimenge de matin, son plaser bèl es d’anar fins al Pargue del Castèl de Fontanablava. Per temps de Covid, coma es una femna precosionosa, emplena menimosament son “atestacion de sortida”, n’i que dison “atestacion de confinament”, sabon pas cossí dire. Puèi carga sus son esmart l’aplicacion Pappy per poder veire en dirècte ont se tròba dins la zona del confinament.
 
E la vaquí partida per son escorreguda, aqueste dimenge 21 de març , amb l’atestacion dins la pocheta de la braieta corteta e l’esmart acrocat al ponhet drech. Arribada al pargue del castèl contraròtle de polícia. Presenta l’atestacion. Perfièch, conven. Mas lo policièr li ditz qu’es sortida del rodòl autorizat , sus son esmart, aiceste legís: 10,020kms. Subtada, Claudina espincha son esmart a ela, aiceste li indica 9,980 kms.
 
Claudina presenta l’aplicacion Pappy al policièr . Aiceste legís ben: 9,980 kms mas li respond que crei mai l’aplicacion de la polícia que Pappy. “E perqué?” li demanda Claudina. Lo policièr s’aucèla: “Per nosautres, lo punt de partença de tota escorreguda es al centre de l’ostal o de l’apartament. Per Pappy, lo punt de partença es quora passatz lo cledon de vòstre ostal, que sètz dins la carrièra!”
 
Claudina ne’n crei pas sos uèlhs. Respond: “Francament me cercatz brègas. Per Pappy lo punt de partença es la sortida de l’ostal, normal, corrissi pas dins ma cosina, entrinqui de corrér dins la carrièra!” E lo policièr de li respondre: “Ieu de Pappy n’ai pas pus e i soi per pas res s’avètz un ostal amb un terrenc grandaràs. Per l’ora, devètz pagar una amenda de 135 èuros.”
 
Malcorada, Claudina paguèt. Un cop tornada a l’ostal, tot se refrescant la codena, sosquèt e se diguèt: “La Covid se passeja sus la planeta tota, son pas 20 ms de mai o de mens que van l’empachar d’anar e de venir! Una amenda de 135 euros es car pagat lo mèstre!”
 
 Lo sèr, Claudina sortiguèt son chin amb atestation de sortida dins una man e cordeleta de l’autra. Abans de sortir se geolocalizèt amb son chin al centre de l’ostal amb Pappy. Puèi s’encaminèt amb son esmart. Faguèt just lo torn del barri. Aital èra segura de pas despassar un rai de 1km! Esperava èsser contrarotlada. O foguèt pas!
 
E, ela, de se dire: aqueste còp rai!