La novèla edicion de la revista literaria Los Caserns Max Roqueta ven de sortir. Es formidabla. Los mots mancan per ne dire la capitada. Es una mòstra bèla de l’ample, la riquesa e la prigondor de nòstra cultura occitana uèi e aicí. Quina demonstracion de qualitat!
 
Tres grandas partidas o dorsièrs emai de relats e criticas d’un fum de libres, disques, espectacles e mòstras. Es plan aisit de lectura per los que son pas d’aise amb l’occitan que lo francés i a bona plaça, e benlèu tròp, mas es un vejaire plan personal.
 
Primièr grand tèma l’istòria amb amb un tèxt saberut e pivelant de Rotland Pecot “Agachs suls miralhs trebolats de l’istòria”. A mai 3 articles estonants de Joan Jaurés, e una descobèrta, lo jornal inedich de l’Escotaire de la vida au Clapàs dau temps de la guerra de 14/18.
 
Per la part literatura son 37 poèmas inedichs de Max Roqueta amb la revirada dau Joan-Frederic Brun. Eveniment! Literatura tanben amb las paginas agudas dedicadas a l’òbra de 2 poètas partits l’an passat: Frederic Jaques Temple e Joan-Maria Petit.
 
Enfin una part bèla dedicada au teatre a l’escasença de la publication a las Letras d’Òc de 5 peças de Max Roqueta. E un texte agut de Joan-Glaudi Foret, apassionat de teatre, a prepaus de mesas en scènas de la Medelha de Max.
 
Es un afart regalant que nos ofrís lo Joan Guilhem Roqueta e sa còla de fonduts de literatura e d’art. Capelada tanben au Jòrdi Souche per la concepcion grafica qu’es plaser dels uèlhs.
 
Lo tot finís dins la natura amb la gostosa cronica etnobotanica de Josiana Ubaud. Cardabèla e salada sauvatja acaban lo menut d’una taulejada culturala magistrala.