Dins la vida sociala, la lenga d’òc es marginaliazada per un fum d’empachas e d’interdiccions e redusida atau a una preséncia residuala. Mas internet permet aus amoroses de la lenga de recuperar una cèrta “normalitat” d’usatge.
 
Per aquò son un fum d’accions associativas afogadas, e, demest aquestas, doas letras electronicas que cadun pòt agantar aisidament e a gratis. Son de fonts de lenga viva.
 
Primièr lo trabalh de l’IEO (Institut d’Estudis Occitans) d’Aude que fa un blòg e una letra quotidiana “Lo Jornalièr Audenc”. Es portat per l’extraordinari Alan Roch en tandèm amb la Mirelha Braç. S’i trapa lo calendièr dels eveniments, l’actualitat artistica, literària e tanben los ressons dau rugby a XIII qu’i son apassionats.
 
Amai fan de suplements coma lo Quasernet de la Sinsòla consacrat a l’animalum, o la letra PQVNL que balha l’actualitat de la mobilisacion dau collectiu Per Que Visquen Nòstras Lengas.
 
Coma lo demon de l’escritura lo Roch l’a dins l’ase, nos balha de textes de tots registres qu’es un regal.
 
Autre fondut de lenga, lo Domenge Caucat mena la Letra de l’IEO d’Erau e dau cèucle Max Roqueta. Aquesta es setmanièra e remanda tanben a un blòg.
 
Es mai illustrada, visuala, amb una amira trufandièira. Es dins l’esperit de l’Escotaire,amb un occitan qu’a lo riset de longa e aquò fa de ben.
 
Lo Domenge qu’a una bona pluma sap trapar de tèxtes gostoses coma los sèus.
 
Nòstra lenga ensenha, amusa e pivèla, atau se fa la vida a l’internet, la vida dau sègle 21en.
 
Per se marcar escriure a ostal.sirventes@wanadoo.fr 
 
e a  ieoerau34@gmail.com