Vòli pas dire mas los promotors de las lengas istoricas /autotòcnas, avèm pas res a crentar!
 
Lo quite president de la Republica es estat estomagat quand a aprés la maissantisa de son ministre de l’Educacion e de sa “groupie”, l’Aurore Bergé… e sa reaccion surprenguèt talament lo Landerneau politic que, lèu lèu, la rumor d’una “fake news” —mot francés mes a la mòda per Donald Trump!— comencèt de circular… E sabètz çò que n’es de las rumors… Los servicis de nòstre bon president deguèron certifiar sa reaccion indignada.
 
Sièis paragrafs cortets mas d’una precision que lo quite Mitterrand, un expèrt ça que la, auriá pas desaprovats; un tèxte a donar coma modèle per las classas d’instruccion civica quand se parlar de la democracia. Òc ben.
 
E amb una frasa clau manlevada a Fernand Braudel, un autor especialista de la question “França”: “La diversitat a un nom e aquel nom es França”.
 
A, vos pòdi dire, brave monde, qu’après aver legit aquelas linhas escrichas a la lèsta, plenas d’una colèra freja e retenguda, ne damorèri sus mon fondament! Disi “escrichas a la lèsta” per çò que degun podiá pas preveire que lo Conselh constitucional anèsse metre lo nas dins los articles de la lei qu’avián fach consensus.
 
Lo ministre Blanquer — e sos “groupies” —o aviá dich: “Ma reticéncia pòrta pas que sus la moneda que deurián pagar las collectivitats”; O diguèt pas mas o pensava fòrt (!!): “lo demai dins aquesta lei es çò qu’ai totjorn preconizat!” — (Lo còr de las lengas: A, a, a!).
 
Nòstre bon president a mostrat qu’amb son agach jupiterian — un agach de naut — res li escapava ni las regions en metropòli ni los territòris au-delà de las mars; coneis l’apellacion de totas las escòlas (calendretas, etc.) e l’eficacitat de lor pedagogia.
 
Enfin, sembla pas possible que los promotors de las lengas agèsson ignorat un aligat de tria coma el… o alara i a quicòm que truca!
 
Una explicacion a la reactivitat del president que val çò que val: las eleccions regionalas s’apressan e l’eleccion presidenciala tanben…
 
…E Pagnol d’apondre: Se pòt qu’aimas la marina francesa mas la marina francesa te ditz…