Vaquí un personatge que podriá simbolizar leis amistats e lei debequinhatges (garolhas) francobritanics!
 
Era la felena dau promier trobador e bessai dau mai gaubiat, Guilhem IX d’Aquitània, tanben Còmte de Peitius. Aguet un destin espantant Alienòr d’Aquitània. Si maridet joineta emb aquèu que venguet lèu lo rei de França Lois VII. Aguet de filhas mai ges d’enfant (de garçon) emb lo Lois... es bessai per aquèla rason que la mandet pintar de gabis (façon imagée de dire envoyer paître) a Peitius dins sa familha, emb l’ajuda de la papautat que rompet lo maridatge, estènt que d’ aquèu tèmps divorciar era pas possible.
 
Aquèu pache emb lo cèu permetet a la bèla Alienòr de si maridar un second còup, emb un prince que sarà Enric II Plantaginesta, rei d’Ingleterra. Alienòr metet l’Aquitània dins la gòrba de la nòvia per la dinastia Plantaginesta. Aquò d’aquí menarà drech a la guerra dicha de 100 ans que durarà mai de cent ans... urosament emb quauqueis apasiments e trèvas!!
 
Emb Enric lo second, Alienòr aurà quauquei filhas e quatre enfants, Enric lo Jove rei, Jaufred de Bretanha, Richard Còr de Lion e Joan sensa Terra. Aguetz pas paur, vos contarai pas l’istòria entrebescada d’aquèu monde. Basta d’ apondre que lo rei Richard Ier siguet eu tanben trobador, avem gardat doei poemas sieus en lenga d’òc.
 
Alienòr siguet engabiolada per son òme que li repròchava de li faire la cara (de menar doble juec) emb lei Francés. Puei aguet tot lo poder en Ingleterra e en Aquitània, après la mòrt d’ Enric II, quora lo rei Richard partiguet en crosada.
 
Se encuei, tant d’ Inglés venon plantar cavilha en Aquitània e mai que mai en Perigòrd, e se dempuei 800 ans s’ empegon emb de vin de Bordèu, es gràcias a .. vo bessai per la fauta d’Alienòr.