Retorn sus la creacion de http://www.nissapantai.com
 
Bastir una ràdio occitanofòna associativa a Nissa e dins lo sud èst occitan, qué trabalh. Cala ben que se fèsta aüra los 100 ans de la ràdio.
 
L’iniciativa parte dal Centre Cultural Occitan País Nissart e Alpenc (CCÒc) qu’a travèrs lo sieu projècte de ràdio fedèra diferentas associacions e personas. Un desenal de personas competentas en lenga -en nissart, en vivaroalpenc ò en provençal- qu’an una experiéncia mediàtica, tècnica e de terren.
 
Aicí, lo terren es pròpi favorable a una ràdio en lenga. De tota la region Provença-Alps-Contea de Nissa, sèm un departiment qu’a una bòna mantenença de la lenga tant en mitan urban coma rural, estimat a 5 % minimum de locutors actius que pòt anar fins a 60% (estatisticas 2002-2006 sus un panèl de 200 personas dins las 163 comunas departimentalas). De mai se tròba una ret associativa densa e activa que nos sierve de sorgent.
 
Dins aquelas condicions, per 1 070 000 audiors de Mentan a Tèula e de Nissa a Sant Estève de Tiniá, que de mai normal de poer escotar una ràdio FM hertziana en lenga d’Òc. Voliam que los audiors pòscon captar al mens una ràdio en lenga nòstra dins la tèrça ciutat d’Occitània e la quinta ciutat de França en estatjants, dins una zòna de renomenaa internacionala (“Còsta d’Azur”), al mitan de las ràdios francofònas, d’un desenal de ràdios italianofònas, de ràdios anglofònas ò ancara ebreofònas.

En matèria de mèdias, per aplicar l’article 75-1 de la Constitucion francesa, inaugureriam Ràdio NISSA PANTAI ràdio en occitan nissart, alpin-gavòt, provençau sus http://www.nissapantai.com diménegue lo 5 d’auctòbre dal 2008 per la 11ena Fèsta d’Occitània dal CCOc al teatre Francís Gag en Nissa.

Lo mèdia ràdio es mai aisit de lançar que lo mèdia televisual. Per iniciar, la difusion per interret permete d’esprovar nòstras fòrças dins lo temps e de tocar ancara mai de monde que per la benda FM. La tòca es de suplear al manca de servici public occitanofòne dins los mèdias àudios regionals.

Dispausam d’un estudio en vila de Nissa equipat per las entrevistas en dirècte e lo necessari informatic per lo puatge e la difusion interret.




Nòstra grasilha de programas a poscut prepausar dins l’evolucion de la sieu istòria divèrsas emissions setmanieras o mesadieras: Estraça acadèmia, Lectura e debat literari, L’istòria, Debats Chacharound, Rata-Pastrolh (micro-carriera), L’Escatenada, Menchonada de Sciença e Ge, Vision dal mond: Gavotina pantais, Li belugas de Cristòu, Fot Pantai, Corona de Sera... sensa comptar las informacions Panta’info, la difusion de concerts dal país e d’Occitània e de pèças de teatre, de conferenças, las redifusions d’emissions e d’enregistraments dals collaborators e la dubertura a las minoritats linguisticas mondialas.
 
Poètz escotar de músicas de la galaxia musicala occitana, dal tradicional a l’electro.




 

Parallelament, avèm de bònas relacions amb las autras ràdios associativas dals Alps-Marinas e subretot avèm desvelopat d’escambis amb las autras ràdios occitanofònas (en dirècte e via l’anciana estructura sonaia FIMÒC).
 
La nòstra tècola es qu’un jorn aguessiam l’autorisacion d’al CSA regional d’eméter provisoriament sus la benda FM (e magara mai la ret numérica) puei a tèrme lòng, definitivament sus Nissa e los Alps.




D’aquel temps, ràdio Lenga d’Òc radiolengadoc.com emete e redifusa ja nòstras emissions en RNT (ràdio numerica terrestra) sus un espaci que va de Caboalh a Taneron, e de Vença e Torreti Levenç, L’Escarea, Pelha fins a Antíbol coma o mòstra aquela mapa de zòna de difusion RNT:




E per las actualitats d’a venir:
 

— Ràdio Nissa Pantai es acreditaia per curbir lo Nice Jazz Festenal dal 12 al 16 de julhet,
 
— Nissa Pantai serà amb Ràdio Lenga d’Òc per l’Estivada de Rodès dal 22 al 24 de julhet,
 
— l’8 d’aost deuriam tornar a l’estadi Allianz Riviera comentar los rescòntres de l’OGC Nissa...

Volèm far partejar la nòstra lenga e assegurar lo sieu espandiment.
 
NISSA PANTAI, per que lo nòstre pantai vengue realitat!



Nissa Pantai