La campanha de vaccinacion trepeja. Lo govèrn sosca a una lei qu’obligaré los suenhants o quitament totis los adultes de mès de dotze ans de’s hèr vaccinar.
 
Aquí sèm vertadièrament dens la postura politica, pr’amor que mantuns observators hèn remercar qu’una tala obligacion es practicament impossible de botar en plaça. De mès, es gaireben impossible de practicar un acte medicau contra la volontat de la persona segon lo dret internacionau, çò que pòt deishar pensar qu’una lei d’aquesta mena seré aisidament contestada dabans los tribunaus.
 
Se la campanha trepeja, nos podèm demandar perdequé.
 
I vesi una cèrta confusion dens l’esperit deu public entertenguda peu govèrn dens sa comunicacion e los mèdias màgers que’n son lo pòrtavotz.
 
Un còp passats los imatges deu mes de genièr de las discotècas en China qu’arcuèlhavan monde sense la mendra masqueta lavetz que degun èra pas encara vaccinat, lo govèrn francés a tot jogat sus la vaccinacion per combàter la pandemia, çò que susprengoc la premsa estrangèra.
 
An anonciat un 60% deu monde que volèva pas estar vaccinat. Normalament, dens un Estat democratic, i auré podut aver un debat public per n’i véser mès clar. Au contra, am pas vists e ausits que convidats favorables a la vaccinacion, lo demès se podèvan pas exprimir que sus la telaranha que’s muishèc lavetz un espaci de libertat e de debat en tot ahortir, d’un aute costat, çò que daubuns apèran “lo complotisme”.
 
Au cap d’un momentòt, estoc anonciada la proporcion invèrsa, sia 60% que volèvan estar vaccinat. La situacion actuala nos mostra que la chifra vertadièra es meslèu a l’entorn deus 50%/50%.
 
Puèi se seguiscón una seria d’informacions de las qualas èra mauaisit de hèr una sintèsi. Un sexagenari vaccinat de la region parisenca que volèva tornar a una vida “normala” se viscoc rapelat a l’òrdi per lo quite Conselh d’Estat que’u digoc qu’estar vaccinat vòu pas díser que la malautia se pòt pas gahar un còp de mès e tornar transméter.
 
La manca d’objectivitat deus presentator balhèc un idèia desformada de l’informacion, çò qu’alimentèc lo dobte. Un exemple ausit sus France Info: “Dens las Lanas de Gasconha, 23 pensionaris d’un ostau de retirada estón admeses a l’espitau pr’amor deu coronavirus. Deus 23, 21 avèvan recebut las duas dòsis de vaccin, mes estón pas botats en reanimacion, çò que pròva plan l’eficacitat deu vaccin (sic).”
 
Los laboratòris anoncièn a la debuta uns 95% d’eficacitat. Tot lo monde comprenoc que, se recebètz lo vaccin, auratz pas que 5% de possibilitats d’estar malaut. Puèi apareishoc lèu clarament qu’estar vaccinat empacha pas de gahar lo covid, e qu’au contra, un relambi de la vigilància de personas vaccinadas es estat dens d’autes paises l’encausa d’una represa de la pandemia.
 
La sola chifra valadera es que protegís a 87% d’un fòrma grèva, doncas es conselhat a las personas que patissen de problèmas de santat. Mes, a los que presentan un risc de trombòsi? A la debuta de la campanha de vaccinacion se balhava tanben lo nombre de personas mòrtas de trombòsi, acompanhat deu taus per rapòrt aus vaccinats, puèi aquesta donada a ara desapareishut. N’i auré pas mès?
 
Los paises en avança sus la vaccinacion (GB, Israèl), semblan conéisher una andada navèra, mentre que lo govèrn francés bota una fin a las mesuras sanitàrias en tot anonciar una represa de la pandemia per la dintrada. Confusion, me diseratz?
 
Se calèva hèr un resumit, causa mauaisida, diserí que la vaccinacion sembla bona peu monde qu’an patologias a risc o comorbiditats, meslèu desconselhada a los qu’an un risc de trombòsi e qu’après aquò, cadun pòt causir çò que harà en consciéncia, en ensajar de trobar informacions fidablas, mes aquò es una auta istòria …