Lo 12 de julhet de 2021 lo president de l’Estat francés, Emmanuel Macron, anoncièc l’espandiment deu “passaclau sanitari” per çò qu’es deus restaurants, estanquets e fòrça causas mès.
 
Causiscoc atau la politica de “la vaccinacion per totis” per reglar lo problèma de la pandemia. Lo president virèc doncas l’esquina au metòde scientific de basa en farmacologia qu’es de calcular lo rapòrt entre benefici e risc. Es aquò la clau deu problèma.
 
L’argument estoc lavetz de díser qu’i avèva pas mès léser de transigir pr’amor que la situacion èra a’s pejorar. Çaquelà, una simpla comparason dambe l’annada passada muishava plan que la pujada de cases èra sustot devuda a las vacanças e au creish de tèsts. Las personas “dambe risc” èran dejà màgerment vaccinadas e l’aucupacion de leits de reanimacion èran lavètz fòrça baisha. Lo jorn de l’anòncia la chifra èra au mès baish, 18,9% de lheits aucupats.
 
La chifra de la reproduccion (lo nombre de personas infectadas per una persona tocada peu virus) que, generalamant, mostra coma se va passar la seguida, se botèc a baishar tre lo 20 de julhet, çò que hascoc pas totun cambiar la politica presidenciala. Estoc lavetz a 2,12 e ne sèm ara a 1,32 (lo lindau d’urgéncia es a 1,5).
 
Lo problèma de tot aquò, es que, per seguir son refús deu metòde scientific e convéncer la majoritat de la populacion, lo poder a besonh deus mèdias. Se’n servís doncas pro bravament e la resulta es meslèu de las pietadosa. Vaquí un subjècte per lo quau, ara, lo mèdias dependents de l’Estat se pòden comparar haut o baish a los de Corèia deu Nòrd. E me trufi pas.
 
Lavetz que vesèm passar sus la telaranha articles de totis sus las manifestacions en Italia sus çò qu’apèran il green pass, lo brave Alban Mikoczy, mandat especiau sus plaça per França 2 nos hascoc un reportatge que muishava pas que “micro-trepaders” de monde plan contents, a qui tot aquò pausava pas nat problèma, au contrari.
 
Les cau amagar los preavises de cauma deus opitaus de Marsilha o Bordèu, deus pompièrs deu Nòrd, etc …
 
L’ahar de la mòrt de Jacob Desvarieux, creator e cantaire deu grop Kassav es plan simptomatic (se pòdi díser) de l’embrolhadís mediatic. Aquesta artista talentuós, se moriscoc per malastre a l’edat de 65 ans lo 30 de julhet. Purmèr estoc anonciat que la causa deu decès èra lo Covid-19. Benlèu per hèr pensar au monde que vau milhor estar vaccinat. Puèi apareishoc que lo cantaire avèva recebut 3 dòsis de vaccinacion. Aquò hascoc pas qu’amplificar lo dobte dejà hòrt deus Antilheses de cap a l’injeccion. Lavetz la premsa se botèc a díser que la mòrt èra pas causada peu Covid mes benlèu per un aute antecedent. Caleré saber. Quan la volontat politica se substituís a l’informacion …
 
Lavetz qu’un debat (a còps masclut) s’installèc au demiei de la populacion, pas nat reclam pareish pas dens los mèdias conta-rotlats per l’Estat.
 
Aquesta causida non-scientifica pausa tanben un problèma democratic. En tot saber qu’a la debuta de la campanha de vaccinacion 40% de la populacion volèva estar vaccinats, se virar de cap a un “vaccinar totis”, com se hè dens una minoritat de paises, (benlèu aquestes on los laboratòris an mès de pes suu poder), vòu díser aver pauc de consideracion de cap a un sentit espandit dens la populacion que, en teoria, lo president deu representar.
 
Escrivi aqueste article la velha de la mesa en plaça deu passaclau dit “sanitari”, espèri qu’aquò pausarà pas tròp de problèmas d’òrdi public, e’m chepiqui particularament peu monde deus estanquets e restaurants (Non pas los “rotèrs”) qu’an pas enveja, ni lo personau, ni lo temps de jogar aus gendarmas.
 
L’avenidor nos ac diserà …