Dus miliardaris, lo Ricard Bronson, de Virgin Galactic, l’11 de Julhet, e lo Jeff Bezos, de Blue Origini, lo 20, an experimentat los viatges subre-orbitals que vòlon desvelopar tre 2022. Al cors d’aqueles d’un desenat de minutas, a un centenat de quilomètres de la tèrra, los toristas espacials poiràn remirar la corba de la nòstra planeta e viure quatre minutas d’apesantor. La Virgin Galactic a botat en venda las bilhetas a 200 000 $, que ja 250 000 son estadas vendudas; la Blue origini, que n’a pas encara fixat lo prètz, a venduda la primièra a l’encant a 28 milions de dòlars, lo budget quotidian de 15 milions de personas vivent al solhet de pauretat.
 
Aital, pendent qualques minutas, un pecic de fortunats poiràn pujar luènh de las classas popularas e de la pauralha, tot ensús, que la misèria e lo patiment d’aicí bas s’i veson pas.
 
Mas lo còst d’aquel torisme serà tanben pesuc per la planeta, d’aprèp un estudi publicat per The Conversation. Un vòl subre-orbital produsís 4,5 tonas de CO₂ per passatgièr, l’equivalent d’un torn de la tèrra en veitura; mai grèu, 1000 vòls produsiràn 600 tonas de suèja que, a l’abric de l’escuratge de la pluèja, demoraràn en suspension dins l’estratosfèra pendent detz ans.
 
Caldriá ajustar a aquelas chifras lo còst en CO₂ de la bastison dels passes de tir de las fusadas: l’aeropòrt de Roissi ocupa 32 qm2 per 70 milions de passatgièrs per an e la basa de Speace Port America, de 73 qm² servirà pas qu’a 1000 vòls per an.
 
Caldriá tanben ajustar la pesada de la fabricacion de las fusadas, qu’una granda partida d’elas poirà pas se recuperar e se doblidar pas lo consum d’energia pel sos lançament .
 
Rai l’avenidor negràs que nos espèra. Ara, lo profit e lo plaser, e aprèp nosautres lo deluvi… o puslèu, lo fornàs !