Lo 8 d’agost passat, lo fotbolaire Lionèl Messi faguèt sos adius al F.C. de Barcelona. Esmogut per aquela separacion, aprèp mai de vint ans de preséncia dins aquel club, e qu’aviá de mai jurat de pas jamai quitar, las lagremas li venguèron als uèlhs, al cors de la conferéncia de premsa que teniá al Camp Nòu. Son esposa, qu’èra prèp d’el, li faguèt passar un mocador de papièr que segurament deguèt getar o doblidar aprèp se’n èstre servit.
 
Un anonime, que lo recuperèt, lo botèt en venda a l’encant a 1 milions de dollars. Lo site encargat de l’afar precisa que la valor d’aquela relíquia es inestimabla per aver reculhit las lagremas e tanben las secrecions nasalas del campion, coma un testimòni pertocant de son emocion mas sustot coma contenent son material genetic que permetriá de lo clonar.
 
Qué siá per ne far una relíquia, objècte d’adoracion e de pelegrinatge, o per lo tenir a la dispausicion de la sciéncia de deman, lo que se poirà crompar lo mocador se deu pas mocar ambe la marga o las pincetas! Mas que se malfisen, los crompaires! L’abadia de Codonh -Cadouin-, en Dordonha, deguèt sa fortuna a la possession del Sant Susari, una estòfa que l’orladura n’èra ondrada d’arabesques, que foguèt l’objècte d’una granda devocion, e qu’atraguèt pelegrins, dons e ofrendas dincas a 1936. S’avisèron a’n aquela data, qu’aqueles arabesques de l’orladura èran pas una simpla decoracion mas un tèxte que raportava un verset del Coran e que permetiá de datar lo teissatge de l’estòfa de XI sègles aprèp lo Crist, e de s’avisar que los Crestians avián adorat una relíquia musulmana pendent nòu sègles !
 
Vertat que la Glèisa dispausava pas, e dispausa totjorn pas, de l’ADN del Salvaire.