Lo verbe “Démarquer” a pas per lei pastres quora parlon francés lo meme sens que per lei comentators de fotbal a la tele. Ven dau provençau “demarcar”, volent a dire perdre sa marca, pintada sus l’esquina de sei fedas, anoges, arets, tardons e flocats, per posquer recuperar son aver au demontanhatge, en triant au pas forcat.
 
Demarcar vòu dire d’un biais imajat, vendre sei motons e abandonar lo mestier. N’i a de mai en mai de pastres que demarcon tant la situacien es pietadosa. L’òrdi e lo blat an fòrça aumentat, lo fen e la palha tanben, coma lei remedis e lei vaccins. Pareisse que lo pastre duu ara despendre ("dépenser" e non "dépendre") 9 euro per produire un quilo de carn d’anhèu. Mai pecaire es luenh de vendre lo dich quilo de carn a n’aquèu pretz. Ben content se pòu tocar 8 euro en comptant aquí dedins lei primas. Nombrós son lei pastres que reçubon ges de primas e per elei es encara mai catastrofic. Sus l’ensèms dau territòri francés, lei pastres de motons reston gaire mai de 70 000, èran tres còups mai nombrós l’i a trenta ans. Dins lo meme temps l’efectiu dei fedas a demenit èu de quaranta dau cent. Sariá ara de uech miliens de fedas maires. Aquò mòstra que lei pastres restant son oblijats d’aguer de ralhs mai importants per tirar un revengut aceptable.
 
Au “Salon de l’Agriculture”, lei ciutadans veiràn leis ovins diplomats en representacien. Leis arets Ile de France, leis anoges (antenaises) Merinos d’Arle, lei fedas Preaups emb son anhèu. Aquelei visitors si dobtaràn jamai qu’una part dei mestres d’aquelei belei bèstias perdon sei bralhas (s'arroïnan) en travalhant.