Lo numerò d’octobre de Philosophie Magazine publica “migrants a las frontièras de l’umanitat”, un reportatge de Pèire Terraz, que s’embarquèt a bòrd de “l’Ocean Viking”, un naviri afretat per l’ONG “SOS Miègterranèia”, per tal de cabussar dins aquel naufragi umanitari a las pòrtas d’Euròpa.
 
E del 24 de julhet al 11 de agost, acompanham lo reportaire entre Sicília e las còstas nòrd africanas sus aquelas aigas “internacionalas”qu’escapan al Dreit, levat l’obligacion pels estats los mai pròches de portar secors a tota persona en dangièr, e que son vengudas un cementèri gigant. L’acompanham quand Malta, refusa de los ajudar, quitament pas per localizar una embarcacion en grand perilh. L’acompanham al cors de sièis salvaments, l’un de 253 subrevivents sus una nau de mai de 400, sens cap d’ajuda de las autoritats. L’acompanham dins la longa espèra de l’autorizacion de desbarcar mentre que las viandas diminuisson dangierosament e que la santat dels passatgièrs se desmarmalha. L’acompanham quand vei davalar lo darrièr naufragat dins un pòrt de Sicília e los migrants, pès nuds, una cobèrta jol braç, pujar dins un carri enrodat de policièrs per entemenar un long periple de misèria.
 
A la seguida d’aquel reportatge, una cronica evòca dus projèctes de bastison de còpias del Titanic. La primièra d’un còst de 500 milions d’euròs es l’òbra del miliardari australian Clive Palmer que assegurarà crosièras sus la rota de la nau mitica. La segonda realizada pels Chineses, en cala seca dins lo Sichuan, qu’auriá costat 130 milions d’euròs lisarà pas jamai sus l’aiga. Albergarà los toristas d’un pargue de léser a rason de 250 èuros la nuèit.
 
Entre los dus articles una pagina prepausa la lectura de l’obratge de Tomàs Piketty: “Una brèva istòria de l’egalitat...”