Lo 1r de decembre de 2018, a Marselha, en marge d’una manifestacion de gilets jaunes, Zineb Redoane, una femna de 80 ans, trobèt la mòrt, tocada en plena cara per una granada lacrimogèna, mentre que se barrava las fenèstras de l’apartament.
 
Lo 30 de octobre, al moment que se torna parlar dels Gilets jaunes e del taus de simpatia (40%) que reculhisson encara dins l’opinion, en aquel tresen anniversari de la debuta del movement, apreniam que lo CRS a l’origina del tir serà pas remandat davant un conselh de disciplina.
 
Pr’aquò, l’IGPN (polícia de las polícias) aviá estimat dins un rapòrt del 20 de mai, que lo CRS aviá realizat un tir reglamentari, sens afustar la victima, de segur, mas qu’aviá mancat a «l’obligacion de discerniment per una accion manifèstament inadaptada». Pasmens, lo director de la polícia nacionala (DGPN) tenguèt per bon que la «lassièra», la «manca de visibilitat», «la tension» e la «necessitat legalament establida de tirar» dispensavan lo CRS qu’aviá tirat, de sancions disciplinàrias.
 
Aital lo foncionari «fòrça plan notat», deurà seguir un estagi per «se far rampelar las consignas que s’aplican sus l’emplèc dels mejans de defensa».
 
L’enquista administrativa passada tanben a l’Informacion juridica es totjorn en camin. Un rapòrt d’expertisa concluguèt que lo policièr aviá tirat segon las règlas, «tir en campana», mas una contra enquista video, al contrari, concluguèt a un tir «tendut», proïbit cap a un immòble e encara mai, situat pas qu’a un trentenat de mètres.
 
Quinas que sián las conclusions de la Justícia, poiriam rampelar al director de la DGPN que se lo que teniá l’arma mancava de «formacion», los responsables son los que la li an fisada sens s’assegurar de sas competéncias. Es una question de bon sens, de biais, de «discerniment».