Fa mai d’ans que la restauracien de l’arèna de Frejul es acabada. Un còup dau mes li passi davant en anant au coifur...e pasmens me li poadi pas acostumar. Eri anat veire lo resultat deis òbras, au defòra e au dedins, après l’inauguracien, e n’eri restat candit. Lo monument roman es estat descarrat, escondut sota d’estruturas de ciment e de ferre. Coma lei “Monuments historiques” an poscut laissar passar lo projecte d’aquèla marrida accien? An vogut faire un espaci moderne per leis espetacles d’estiu, an capitat!

Dins l’arèna de Frejul convidaràn cantaires e dançaires mai plus jamai toreros, peones e picadores. Lo cònsol vòu plus de corridas. Aquèla arèna aviá l’originalitat d’èstre la mai orientala dau monde de la tauromaquiá. Per trovar una corrida au levant de Frejul faliá anar... au Mexique!

Vos dirai que siáu contra la corrida mai pas un adversari acarnassit. Siáu pas vegetarian e se duviáu faire la tiera deis exemples dei bèstias que l’òme fa sufrir lei pajas dau jornau bastarián pas. Quauquaren mi tafura dins la garolha dei pros e antis. Leis anticorridas mai incondicionaus son aquelei que voalon lei lops sus nòstrei montanhas e ara dins nòstrei coalas tanben, sensa pensar ai centenaus de fedas e d ‘anhèus que ne’n son lei victimas. Un buu de combat viu vint minutas de calvari. Una feda nafrada per lo lop viurà detz, vint ,trenta oras de calvari avant de crebar.