Ven d’espelir Lo Senhal99 per ADOC48. I a mai de trenta ans aquela revista sortissiá sus un suspòrt papièr, dempuèi mai d’un desenat d’annadas espelissiá sus susport CD e uèi pel primièr còp pareis en linha. En linha lo N° 99! Un eveniment de saludar. A espinchar de prèp aquela caminada es clar vesent que Lo Senhal a sauput de longa e sap encara pegar al mond d’uèi. Es benlèu una de las rasons de sa subre vida. Per una revista que se tracha d’ensenhament d’una lenga minorizada aquela durada es de joslinhar. I a talamai de parucions, pedagogicas o non, que fan quincanèla aprèp tres o quatre numeròs!
 
I a lo suspòrt e puèi i a lo fons, lo contengut del Senhal qu’espelís tres còps per an. Sa tòca es de portar prodèl a las regentas e als regents qu’ensenhan la lenga e la cultura occitanas als pichons de la mairala a la sièisena. Que l’ensenhaire aja besonh de contes, de comptinas, de poesias, de jòcs, d’alboms, aquí segur ne’n trobarà. Mas lo mai, l’enmai de la revista es l’aparelh pedagogic menimós e plan soscat qu’acompanha cada suspòrt linguistic. Aiceste s’adreiça als regents per los biais d’indicas pedagogicas e didacticas. S’adreiça tanben als apreneires amb de ficas de completar mas tanben amb lo suspòrt linguistic que pòt èsser ausit solet o per la classa tota. Los pichons an l’astre de poder escotar, legir, escriure amb l’ajuda del Senhal. Un suspòrt modèrn per aprene una lenga d’uèi.
 
Las regentas o regents i trobaràn d’indicas e un ligam amb lo projècte pedagogic academic menat cada annada per l’acadèmia de Montpelhièr. I trobaràn tanben d’esclairidas sus de punts de lenga que pòdon trebolar lor ensenhament al quotidian. Amb una soscadissa mai teorica, es escasença per eles, de butar mai en abans lor practica pedagogica. L’interdisciplinaritat, segur, i ten tota sa plaça. Cal ajustar que dins cada n° del Senhal i a un dossièr de cultura régionala. Dins aiceste, se tracha dels monuments als mòrts, luòcs de memòria. Biais bon d’aligar istòria, cultura, lenga...
 
Segur qu’aquela revista pedagogica en linha serà d’una ajuda granda. A veire lo portal d’intrada d’aquel numerò, l’ensenhaire i podrà causir lo contengut que conven a sos besonhs. Puèi, podrà aisidament estampar las ficas que li convenon, far escotar un tròç de lenga qu’a enveja de trabalhar, utilizar lo corregit...
 
Aquela revista es la frucha de la soscadissa d’un còla d’ensenhairas e ensenhaires d’occitan de Losèra paisselada per la conselhièra pedagogica despartamentala. Regentas, regents, cada jorn dins lors classas son eles que sentisson los besonhs, lor manca dins lor practica pedagogica quotidiana. La tòca del Senhal es d’ensajar de i respondre del melhor biais.
 
Ensenhaires, cercaires, afogats de lenga occitana o simple curioses, es idèa bona de s’abonar al Senhal (3n°s per an) en mandant un mèl a: 48adoc@gmail...