Lo cònte que sio de contar es çò que si ditz un "cònte transversal". Si tròba tamben en Barèls e en Solelhàs. E benlèu sus la dralha de Tolon fins als Alps de la valaa. M'es estat contat per Reinat, qu'era enfant trobat, de "l'Assistança". Diso puslèu que me l'a resumat. Es tanta Fina que li contèt. Los tres autres enfants qu'èran plaçats en lo meme ostal parlavan d'ela e de sas doas sòrres coma das tres maschas dau "Potz". Lo teno dau darnier vivent qu'a dich "sorcières" en francés.  En l'ostalàs dau Canton, la nuech vengüa, una filheta avia envia d'anar sus la cucha (molon de fen), mas avia una paurassa dau lop. Li an dich de prendre un mochon (tison) e qu'aquò seria segur, mas lo lop agantèt la filheta que urosament gardet lo tison en man. Lo monde veiet pas la filha quora, d'un còup, sus la còsta dau Serre de Vertuts, lo vent avivèt lo tuen e los òmes an pogut chaçar lo lop e salvar la filheta.  Sus lo sèrre, li es un oratòri qu'era festeat en junh per la Fèsta Diu.