Siáu provençau e varés dempuei mon promier badau. Siáu vengut puei “pacanian” e ara que sarai de mai? Un euroregionau aupomieterranenc o mieterranoaupenc? Conven totjorn de trovar un nom ais estajans de la novèla regien naissuda lo promier de l’an 2008, sensa estrambòrd. Se n’es gaire parlat e se’n parla totjorn gaire de l’associacien dei regiens Liguria, Piemont, Vau d’Aòsta, Ròse-Aups (ara emb Auvèrnha) e P.A.C.A, batejada “Eurorégion Alpes-Méditerranée”. Per que la dicha euroregien aguesse una unitat geografica convendriá que lo canton de la confederacien elvetica dau Valais entresse dins l’associacien. D’aiga de Ròse passarà sota lei pònts de Martigny avans qu’ aquò si vegue. Per lei paisans e lei pastres dei doei pendís deis Aups, aquèla estructura novèla aurà au mens l’avantatgi de permetre ais uns e ais autrei de mièlhs conéisser lei produchs dei vesins. Enquisti dempuei 30 ans dins lei magasins e ipermercats provençaus e m’ avisi encuei que la preséncia dei produchs piemontés e ligures es tojorn tant mistorlina... e ai pas en tèsta d’aguer vist un solet produch vaudotan sus lei linearis varés. Ai bessai mau cercat! Mai se volètz de fromai e de cambajon d’ Emilia- Romagna, ges de socit, ne’n podetz cargar raseta lei caddies ente que siegue. Ai mercats dau cors La Fayette de Tolon o dau cors Salèia de Nissa podretz demandar ai gens se coneisson Castelmagno e Barolo. N’ i aurà gaire per vos dire que son un fromai e un vin, fiertats de la regien Piemont. E se anatz au “Bar des sports”, trovaretz de beveires per creire que jugavon totei dos emb Del Piero e Trezeguet a la Juve.
 
Mi siáu pron escartat dau subjècte euroregionau.