Ivan Pel un frison risènt e amistadós aguet ideia li a quauques ans d’organizar una mena de “Grand prèmi eurovisien de la cançon” per lei lengas dichas regionalas. Un desenat de grops musicaus si recampon cada an d’auton per daverar lei jòias coma dien lei felibres, dins la ciutat de Leeuwarden, la capitala istorica dei Frisons, que veguet nàisser Mata Hari, per aquelei que l’istòria interessa.
 
Lei Frisons qu’ es aquò? Era un pòple de Nòrd d’ Euròpa que viviá en riba de la mar dau Nòrd, dins leis estats actuaus de Pais Bas e Alemanha. Encuei son pus que quatre garis per parlar frison en Alemanha, mai en Nerderland, son mai de 600 000 locutors. Lo govern neerlandés ajuda fòrça lei frisons per gardar sa lenga viva. Es ensenhada dins leis escòlas, es oficiala dins lei luecs publics. Lo governament francés podriá prendre exèmple aquí sus.
 
Basta, per ne’ n tornar au dich festenau nomenat Liet International, acuelha mai de mila espectators dins lo grand teatre nomenat Harmonie que venon auvir cantar gaelic, breton, basco, galician, furlan, sorabe o galés. Es lo tresen an que li vau coma membre de la jurada, per representar leis Occitans, Ivan Pel mi fa aquèu plaser e aquel onor. En 2002, lei Lengadocians de Mescladissa vengueron en quatrena plaça dins un concors que lei catalans de ganheron. En 2003, lei Nissarts de Nux Vomica agueron lo tresen premi e lei Samis s’aganteron la promiera plaça. Sami qu’es aquò? Es lo nom oficiau dei Lapons, pòple pastor dau cèucle polari.