L’autre jorn, dau onze oras, anèri crompar la bageta o puslèu lo michon. Quina suspresa foguèt per ieu de veire de coas d’espèra davant las pòrtas de las farmacias! Me demandèri de qu’esperavan aquelas femnas, aqueles òmes plantats aquí coma de fustas, enmasquetats, clinats, deseimats, agropelats coma de “testards”.
 
Amai s’an bona tèsta, sens mal de tèsta, an dins la tèsta de se far “testar” tot escotant lo grop occitan “TEST” per saber se son encovidats o pas. Mena de crash test. Mas coma l’aurètz totas e totes un jorn, pas la pena d’esperar la resulta, l’aurètz, l’aurem la marrana. Serem o serètz totas e totes covidats o convidats.
 
E puèi? me dirètz. Abans d’èsser testat tant valdriá melhor vos far testaire qu’un còp covidat o convidat, subreviurètz o trespassarètz.
 
Se trespassatz, es a dire destetat, vòstre testament plan attestat serà pas detestat pels vòstres eiretièrs testaruts. Testimoniaràn que la Covid vos a convidat de l’autre caire e ne’n seràn caravirats! Testimònis entestesits!
 
Testada o detestada, testat o detestat, se subrevivètz farètz fèsta. Sus un còp de tèsta o benlèu sus un còp de tèstada, detestamentarètz vòstre testament. Ne’n serètz lo sol testimòni. E pensarètz: quina tèsta?
 
E puèi? me dirètz. Aquò empacharà pas la planeta Tèrra de virar. Pareis que vira lo virús. Es que vira dins un virat d’uèlh o es que viroleja dins una virolada? De qué ne vira? Es que la Covid virola mai lèste que la planeta que se’n vira?
 
E puèi? me dirètz. Aprèp una marrana ne’n vendrà una autra. Es pas la primièra serà pas la darrièra! per parlar coma La Palissa. Per l’ora, esperam aquel Aprèp? Mas un Aprèp per tornar a l’Abans? Es que tornarem trapar l’Abans aprèp? O es que l’Aprèp serà pas coma l’Abans?
 
A espinchar aquelas còlas a l’espèra davant las potingariás, demòri aquí plantat coma l’ase de picas. D’aquel temps, lo temps raja. Es una ora de l’aprèp-dinnar, ora de crompar lo michon que me fa micheta abans d’anar far pencheneta, abans d’anar dinnar!



Clamenç
Umorista occitan