L’eleccion presidenciala se sarra a passet. Que ditz eleccion, ditz votason. E que ditz votason per organizaires ditz aprestar: salas, taulas de montar, cabinas de votar de dreiçar, urnas de sortir, sens oblidar: assessors de convocar,... téner lo burèu una jornada e aprèp: despolhar, proces-verbalizar, resultas mandar...
 
Lo jorn dich, la votaira o lo votaire se n’a enveja, li demòra de se sarrar de la sala de votar que siá a pè, en trotineta, en bicicleta, en veitureta, en camioneta... e de venir amb sa carta d’identitat bilingüe francesa/ anglesa e sa carta de votason sens oblidar son estilò dempuèi la Covid.
 
 Un còp la sala gandida votar pòt préner cinc minutas coma una ora. Temps a esperar amb l’esmart per passar temps. Quin temps de perdut! Avètz remarcat que dempuèi l’espelida dels esmarts e dels escotaires d’aurelha, las salas de votason son mudas. Aurelhas tampadas e agach pivelat per l’ecran.
 
Se vòta totjorn lo dimenge. Perqué lo dimenge? Vos diràn qu’es lo jorn ont las gents trabalhan pas. S’enganan. Al evèrs, es lo jorn ont lo monde son lo mai preses. Ocupats que son a pensar enfin un pauc a eles. Ne coneissi un molon que passan la matinada al lièch e que s’adralhan a boçinejar dau doas oras de la tantossada. Quora s’avisan d’anar votar, l’ora a trescolat.
 
Votar amb un morçèl de papieron a botar dins una envolopa e la far lisar dins una urna me rementa lo temps de ma grand la bòrnha. Al sègle XXI nos cal sortir al puslèu d’aquelas practicas d’un cop èra. Es ora de passar al vòte numeric.
 
Aital sens se desplaçar, ont que siatz, podriatz votar amb vòstre esmart sens vos aucelar. Quin plaser seriá lo dimenge de matin de votar d’un quichadís de det gròs arremicolat jos la flaçada. Me dirètz es ben polit tot aquò mas es que lo numeric o pòt far?
 
S’èra lo càs, lo còdi acompanhat de la clau de seguretat vos seriá mandada sus vòstre esmart. Auriatz per avança dintrat las emprentas de vòstre det gròs. Pendent vint e quatre oras, la fotò de cada candidata o candidat vos arribariá sus l’ecran de l’esmart. Vos demorariá solament de quichar del det gròs sus la fotò del candidat preferit. Amb lo còdi, la clau de seguretat  e las emprentas en un clic podriatz causir per cinc ans vòstre protegit. Quin temps de ganhat! Pas de Co2 produsit per rejonhér la sala de votar. Pas d’espèra. Benlèu que lo taus de participacion creisseriá. Qual sap?
 
E pels organizaires pas pus de salas de reténer, de taulas d’endreçar, de cabinas de votar de montar, d’urnas de despolsar... sens parlar dels assessors de trobar ... de las règlas traucadas de trapar... e las resultas de mandar... sens oblidar las tièras electoralas... la carta d’identitat e la carta d’elector de demandar... e de verificar.
 
Me demandi perqué sem pas encara passat al vòte numeric? Es que la democracia podriá ne’n sortir rafortida? A tot moment, se podriá votar per elegir o deselegir un elegit. De referendoms per balhar la paraula al poble podrián se debanar plan sovent. Benlèu que l’abstencion demesiriá, qual sap?
 
 Alara perqué es pas encara fach? Es qu’un biais de votar modèrn fa paur? Es qu’es un hic pels politics o pel numeric?