2021 fuguèt una annada d’excepcion per las lengas istoricas e autoctònas dau país, e s’acabèt amb la publicacion au Jornau Oficiau lo 16 de decembre d’una circulara novèla per lor ensenhament.
 
Las circularas son de tèxtes fòrça tecnics d’instruccions que son mandadas pel ministre aus servicis per l’aplicacion das leis e reglaments que son plan sovents escurs e complicachs.
 
Atau lo ministre indica pel menut sa politica.
 
De circularas se ne fa gaire per nòstras lengas. La darnièra èra d’abriu de 2017. La ministra Vallaud Belkacem, donava sas indicas d’accion un mes abans de partir, un mes abans la fin dau mandat de Hollande. Aquò’s segur de trabalh seriós!
 
La novèla circulara fa 7 paginas conflas de caractaris plan pichonets qu’es un regal de lectura. Pamens val lo còp.
 
Lo contexte èra lo de la lei Molac e de la desastrosa decision dau Conselh Constitucionau contra los accents e l’immersion. Decision talament capbordassa qu’entrainèt una reaccion mai que viva de sosten a l’immersion dau quite President de la Républica e l’engajament dau Primièr Ministre.
 
Atau i aguèt una concertacion jamai vista per la redaccion d’una circulara amb los oficis das lengas emai amb las associacions immersivas.
 
Fin finala i a d’avançadas nètas.
 
L’immersion reconeguda coma metòd pedagogic se poirà far dins lo public e contunhar dins l’associatiu coma Calandreta e Bressòla. Demai ara de lengas novèlas coma lo francò-provençau, lo flamand o lo picard se poiràn ensenhar.
 
Mas una circulara securiza pas vertadièrament. Ara l’accion serà de ganhar un vertadièr Segur de nòstras lengas, es a dire cambiar la Constitucion.
 
 
 
 

La circulaire sur les langues régionales promise par le Premier Ministre vient de paraître. Elle sécurise l'enseignement immersif dans le public et l'associatif. Je m'en réjouis et serai attentif aux moyens alloués par les rectorats afin d'étendre l'offre d'enseignement pic.twitter.com/qFOzUKp5UZ

— Paul Molac (@Paul_Molac) December 16, 2021