Ambe la pandemia, l’utilizacion de la bicicleta en vila a crescut d’un biais espectacular. E lo caireforc demòra lo punt que la confrontacion de l’auto e de la bicicleta i es la mai dangierosa. Aital, a Pantin (93) venon d’inaugurar un caireforc olandés, equipament que ven del país que la bicicleta i es reina, lo 7n dins lo departament.
 
Per s’aparar del dangièr que representa per el la veitura, en primièr, lo ciclista pòt far lo torn complet del caireforc sens quitar la pista ciclabla, senhalada a la pintura verda sus la calçada; en segond, per anular los angles mòrts, mai que mai quand lo ciclista va tot dreit e que la veitura vira a dreita, la pista ciclabla es desviada cap a dreita de tal biais que veitura e ciclista se trapen non pas parallèls mas perpendiculars; e coma la pintura al sòl sufís pas, obligan la veitura a contornar un illòt en amètla marcat per de paisselòts. Lo ciclista que vira a esquèrra, autra situacion perilhosa, li sufís de far lo torn del caireforc en dus temps, en s’arrestant al fuòc roge.
 
La situacion d’un candidat a una eleccion, subretot s’es dels mai freules dins los sondatges, sembla a la d’un ciclista dins un caireforc. Per se far pas espotir pels gròsses SUV al cap dins los mediàs que viran a dreita o que van tot dreit, li caldrà en primièr se pèrdre pas la dralha verda; se vòl anar tot dreit o pièger s’engatjar a esquèrra deurà modificar sa trajectòria cap a dreita, en convéncer lo monde qu’es per melhor anar a esquèrra.
 
Coma los caireforcs electorals son pas encara equipats coma los olandeses, pòt èsser temptat per un autre biais de far: lo traversar a trauca-sègas, çò que necessita d’arrestar la circulacion en auçant barricadas o en se far acompanhar d’una molonada de personas.
 
 
 

#WorkInProgress à Pantin. La piste transitoire réalisée par le département @seinesaintdenis avance à grande vitesse. Ici : un carrefour dit à la hollandaise. pic.twitter.com/HLUQLFvMdX

— Olivier Stern  (@olivier_stern) March 23, 2021