Un desenat de jorns après lo còup d'estat de 1851, leis insurgènts republicans varés eran batuts as Aups, vilatge entre Draguinhan e ribas de Verdon. Un regiment ais òrdres de Napoleon lo pichon aviá fusilhat quauquei revautats per mostrar que lo regime novèu era autoritari e que conveniá de s'esquichar. Fusilhat doei còups, lo promier còup l'avián pas tuat, lo joine Martin de Barjòu dich Bidouré, venguet lo simbòle d'aquèla resisténcia a l' absolutisme.

Que nos resta encuei dins lo Var en remembrança d'aqueleis eveniments? De noms de carrieras dins lei vilatges e ciutats que lei visqueron e de lauvas sota lo buste de Mariana la republicana. Sant Rafèu, ciutat balneària chic a pasmens sa carriera, sa traversa e son androna Martin Bidouré. A Vidauban li aguet un grand recampament dei colonas vengudas dau Muei e daus Arcs, dau gòlfe de Sant Tropètz e de la Gàrdia (la Garde- Freinet). La carriera Martin Bidouré de Vidauban, perpendiculària a la carriera Robespierre, es parallèla a la rota nacionala 7, de lònga clafida de veituras e de camions.. Li vièm jamai degun.

Ara que 170 ans an passat, ce qu'avem de mai preciós resta segur lei sovenirs familiaus. Gràcias a una dòna de Sant Rafèu que faguèt de recercas sus la colona partida d'aquela ciutat, aprengueri qu'un oncle aluenchat dins nòstre aubre genealogic, vivent  a Puget de Frejús (aujourd'hui Puget sur Argens), aviá crompat per 22, 50 francs de poussa (poudre). "Joseph Abbe dit le santon, le plus exalté dans les sentiments démocratiques" segon lo cònse dau tèmps, aviá donat la poussa ais insurgènts. Aquò li costet un sejorn en gabiòla e doei dets que siguesse mandat en Algeria. Au retorn de la République, reçubet una pensien de 300 francs.