Se jugava a temps passat en Provença a la “lònga” dicha tanben juec provençau emb de bòchas o bolas claveladas. A partir dau redond, lo ponchaire faiá un pas e lo tiraire ne’n faiá tres. Se li juga totjorn, dieu mercés, emb de bolas modèrnas, metallicas, mas la petanca a pres lo dessús pe lo nombre de jugaires, de concorses e per la cobertura mediatica.
 
Una dei legendas ditz qu’es a l’Arsenal de Tolon que la petanca es estada inventada. Dins lei talhièrs, lei obriers mancavan de plaça per jugar a la lònga, avián decidit que lei jugaires sortirián pas mai dau redond e que la portada maximala seriá de 10 mètres. Lo fenhantitge deis obriers de “la soarba” subernom de l’arsenal (lo bòsc de sorbier trabalha pas) èra proverbiau.. e pòu èsser immeritat, es un autre subjècte. Lo mot petanca ven de “pès tancats”, pès immobils. En francés d’aquí se diiá: “On va jouer à pétanque”.
 
Dins lei concors per tripletas de mon enfància i aviá doei ponchaires e un tiraire. Lo juec de la bola ponchada èra essenciau e demandava ai jogaires d’èstre adrechs e malins. Un bòn senequier èra sovent crentat per leis adversaris.
 
Encuei se deforalha en cò dei professionaus. Aiáu agachat lo Trofèu l’Equipa dei dobletas lo 8 de genièr sus la cadena 21. En 1/2 finala Madagascar a batut Tunisia après qu’un jugaire malgash ague fach 5 estancas (carrèus, la bola dau tiraire remplaça la bola advèrsa) de contunh.
 
En finala, Tailàndia a batut Madagascar en reüssissent un festenau d’estancas e de palets (la bola dau tiraire lèva la bola advèrsa sensa la remplaçar, es lo vocabulari de mon vilatge). Un a tirat de bolas situadas a 2 mètres dau bochin. Nòstra petanca ven un concors de tir. Ai aprés a l’eissida d’aquela finala que s’agissiá d’aquela de 2018! A aquela ocasien, la dobleta francesa èra arribada en 1/2 finala. 
 
Petanca e rugbi an pres l’autan la draia “bom puèi badabom”. Lo contacte a remplaçat l’esperit d’iniciativa, la soplesa e l’imaginacien dau jugaire, la fluiditat dau juec. Foguèssi president dau fedes d’aqueus espòrts, ensajariáu de chamjar de règlas. Per exemple, obligar una equipa que dispausa de sièis bolas d’aver lo drech de ne’n tirar que tres au maximum. Un serà obligat de li venir per que la petanca professionala garde son atrach... mas dins 30 ans bensai. Per l’interès de la petanca, faudriá que leis amators e lei professionaus contunhèsson a practicar lo meme espòrt que privilègia l’apròchi dau bochin per lei bolas.