Lo rugbi es malaut. Malaut d’un reglament mau engimbrat, malaut d’una profesionalizacien mau mestrejada. “Seul le résultat compte” braman cotria lei presidents de clubs e leis entrenaires dei clubs dau Tòp 14. Tengut compte dei molons de sòus despenduts per crompar lei melhors jugaires de XV dau monde, la victòria es mens per l’onor d’una ciutat que la necessitat de resultats d’una entrepresa que duu contentar seis esponsors.
 
Lei mieg-finalas e la finala dau campionat 2012 son lei consequéncias pietadosas d’aquela evolucien. Ges d’assai marcat dins lei 240 minutas dei tres partidas e pasmens a Tolon aviam Wilkinson, un dei melhors durbaires mondiaus, l’australian Giteau un dei melhors centres, lo capitani sudafrican un dei melhors n°8... e l’ancian menistre deis espòrts per entrainar aquèu monde. Sus lo margau deis estadis avèm vist si pinhar lei uech de davant, gaire mai.
 
Que Sant Rafèu e Grassa si contentesson en Federala 2 d’una bolegadissa entre lei gròs de davant si pòu comprendre, mai entre Tolon e Tolosa, nani!
 
Ben lèu leis abonats de Canal virarián l’esquina au Tòp 14 se lei captaus dau board trovavan ges de remedi.
 
Tau que mi viètz, de remedis n’ai per prepausar ai dichs captaus... En promier faudrà limitar lei mesclanhas a una soleta intrada e donar un còup franc darnier au beneficiari de la mesclanha se marcha pas dau promier còup. A l’ora d’ara la mitat dau temps efectiu de juec es gastat dins d’inacabablas mesclanhas que cagan un, dos, tres còups avans que lo balon siguesse jugable. En segond faudrà limitar la durada dei mau nomenats “pick and go” ent conven mens d’avançar que de ganhar de temps en gardent lo balon au caud. En tresen, faudrà demenir lo cost de la penalitat de 3 a 2 vò 1 poeits per donar mai d’importància a l’assai de 5 poeits. Lo carton jaune es aquí per punir leis autors de marrideis acciens.
 
S’acabarà bessai ansin lei finalas que lei Tolosans ganharàn de 6 còups de pè còntra 4.