Senglier, senglar o poarc fer, lei tres noms son emplegats per aquelei maufatans que fan de mai en mai de mau dins lei bens d’un an sus l’autre. Una arnada s’èran tuats mai de 400 sengliers sus ma comuna e pasmens patissi per manjar un gran madur de clareta dei cincanta socas qu’ai davant l’ostau. Lei sengliers mi rasclan tot avans que lo rasin maduresse. La multiplicacien dau nombre de poarcs vendriá dau fach que lei sengliers son estats mesclats emb de poarcs domestics e que lei fumèus que faián un còup de l’an tres o quatre marcassins ara si meton a cagar doei còups de l’an uech o detz porquets. Basta de prendre voastre telefòne calculaire e de faire un còmpte en projetant sus cinc ans, meme emb una mortalitat de 50% deguda ai còups de fusius, vos avisaretz que la creissença es exponensiala. Se lei trueias fan de porquets doei còups de l’an es tanben qu’an de viure (de manjar qué) a baudre e qu’an ges de besonh d’anar boigar d’oras dins la fanga per crussir quatre malurós cacalaus. De viure ne’n tròvon d’en pertot entre lei mes d’abriu e d’octòbre: blad, òrdi, blad de turc, trufas, liumes, raïms. Leis exemples son nombrós de viticultors que ramasson pus ren sus de peças d’un parèu d’ectaras de vinhau. Manco lei fius electrics leis arreston aquelei poarcs. Aquò es agut arrivat a mon amic Enric d’Agai e li arriva ara totei leis ans... e pasmens èu e sei fraires son de cassaires de sengliers de promiera! Mai a la marrida sason quora lo manjar si fa rare, pareisse que l’i a de caçaires que li donon de pan per leis entretenir maugrat que la lei v’enebisse. Siáu favorable a la caça e ai caçaires e siáu grand afogat de dauba de senglier, mai aquí dirai basta. La prolificitat dei trueias sariá mens importanta se li aviá mens de manjar mes artificialament a disposicien, e lei poarcs fers sarián mens nombrós per anar chaplar lo raïm dei viticultors avans leis endumis. An ja pron de dificultats sensa patir en mai de la concurréncia dei cosins sengliers que son coma nautrei de mamifères omnivòras galavards. La solidaritat dei caçaires emb lei paisans duvriá èstre una prioritat.