Los progrèsses de la biologia nucleara rendriá possible uèi la resurreccion del mamot lanut, desaparegut fa 4000 ans. Los espers dels sabents se fondan suls rèstas de la bèstia congelats dins lo pergelisòl siberian.
 
Coma lo genòma del mamot revèrta a 99% lo de l’elefant d’Asia, seriá possible d’utilizar femèlas d’aquela espècia per la nòva creacion. D’unes sabents n’estúdian lo clonatge, d’autres pensan a l’inseminacion artificiala, d’autres trabalhan sus la modificacion dels gèns de l’elefant de tal biais de crear un mamot que seriá un elefant geneticament modificat. Aquel projècte seriá una contribucion a la lucha contra lo rescalfament climatic: aqueles novèls mamots, introdusits dins una resèrva de 160 qm2 en Siberia, i mantendrián la vegetacion baissa qu’apara lo sòl del solelh, e, en trepejant, empacharián la formacion de pòchas de metan, gas a efècte de sèrva.
 
Uèi, en França, luènh de Siberia, es la question de la subrevida dels elefants d’un partit politic que se pausa. Crentan lo siu escantiment: las condicions de vida son de mens en mens aisidas, l’environament de mai en mai ostil, los predators de mai en mai nombroses, al punt que los joves elefantons son a mutar, a se demandar se sèm pas en preséncia d’una nòva espècia.
 
Plan segur, per salvar l’anciana venguda «en camin de desaparicion», poiriam utilizar las ressorgas de la genetica. Semblariá mai aisit que per la respelida dels mamots, qu’existís encara d’especimèns en vida.
 
Mas a la diferéncia dels mamots desapareguts per causa de rescalfament climatic e de caça excessiva, los elefants politics se son pas encara escantits mas son a mutar subtament, amodats per l’abrivada del temps, per melhor s’adaptar: de voler reviscolar los ancians especimèns seriá anar a contra-darwinisme.