Article Nòu, cadun fa coma...
 
Aquel article es aquèu que preferi dau reglament interior de noastra Provença eternala.
 
“Article 9, cadun fa coma vòu”, la libertat de totei es afortida, lo patit generau es a venir.
 
Coneissi d’autrei versiens dau dich article: “Article 9, cadun fa coma pòu”, “Article 9, cadun fa coma sòu”, mens libertaris que lo promier.
 
“Article 9” es tanbèn lo nom dau Còro deis amics de Correns (Var), capitala de l’agricultura biologica de Provença orientala. Sabon maridar umor de la boana e qualitat musicala.
 
A prepaus de maridatge... Dau mòt “Nòu” es naissut “Nòvis”, lei joines o mens joines maridats. M’agrada que li ague lo meme nom per la Nòvia -de prononciar “nòvi”- frema e lo Nòvi òme. Es una marca d’unitat e d’egalitat dins lo parèu que li a pas dins d’autrei lengas romanas ente la “Novia” s’acara emb lo “Novio” coma en castilhan.
 
Mi diretz que lei nòvis “vertadiers” lo jorn de son maridatge duvon pas si faire cambeta dins lei comunas lo dissabta. Lo temps a passat dempuei que la vida amorosa s’entemenava la nuech dau maridatge.  Encara que duu n’i aguer de nòvis vertadiers encuei.