L’actualitat dau reiaume d’Espanha es plan interessanta e fa veire un biais originau e pebrat de far viure la democracia.
 
L’atencion mediatica aicí es pivelada per la guèrra d’Ucraïna e nòstre maraton electorau. Pasmens es plan utile d’agachar lo pintoresc de la vida democratica au reiaume d’Espanha, país ont la libertat d’expression es en mòde borbornian.
 
Atau dos cantaires son estats condemnats per de cançons que fasián “injúria a la corona”, pintoresc, non?
 
Un, Pablo Hasél es engabiat dempuèi mai d’un an, e l’autre, lo rapaire Valtonyc, viu en exili a Brussèlas per escapar a un condemnament de mai de 3 ans. Avián cantat “Borbon Ladron”, rima corta per dire quicòm qu’es conegut de totes per Juan-Carlos 1er. Aqueles condemnaments foguèron denonciats en dire que “Sens libertat d’expression i a ges de democracia”
 
Se trapa que la justícia de Belgica ven de refusar l’extradicion de Valtonyc per condamnament sens motiu justificat, e de quitar de lor legislacion aqueste delicte d’un autre temps.
 
E figuratz vos qu’au meteis moment lo Ladron, qu’èra dempuèi tres ans refugiat a Abó Dabi, es tornat pavonejar en glòria dins son reiaume.
 
Per completar lo tablèu se descobrís que dempuèi d’annadas la majoritat dels politics catalans, emai lors presidents, son espiats per l’Estat amb lo logicial Pegasus.
 
Lo Ladron se passeja, los denonciaires son condemnats e los politics espiats en massa ...
 
e viva Espanha!